Bizi Baratzea proiektuaren barruan, eguneko festa berezia antolatu du Argia aldizkariak, irailaren 7rako. Orona Ideon, 11:00etan hasita, hitzaldiak, lore eta landareen inguruko aurrez aurreko kontsulta eta jaki dastaketa izango dira, jasangarritasuna oinarri.
Diametro 200, Lur Garden, Karabeleko eta Bizi Baratzea
Hitzaldiak izango dira elikadura osasuntsuari eta bertako eta garaiko ekoizpen ekologikoari buruzkoak.
Aurrena, Diametro 200 jatetxeko Fede Pacha eta Iñigo Marquet, Orona Fundazioko Garapen Zuzendaria ariko dira, ekoizle txikien eta nekazaritza ekologikoaren inguruan. Gero, Karabelekoko Oier Iurramendi hernaniarra, ekonekazaritzaz eta errehabilitazio psikosozialerako zentroaz arituko da, eta segidan, Lur Gardeneko Iñigo Segurola, paisajismoaz.
Zuzeneko kontsulta eta luntxa
Hitzaldiekin bukatzeko, Jakoba Errekondo paisajista eta agronomoa, Bizi Baratzea proiektuaz ariko da. Era berean, jarraian, Iñigo Segurolarekin batera, bertaratutakoek lore eta landareen inguruan dituzten zalantzak argituko dituzte zuzenean, aurrenekoz.
Bukatzeko, bertako eta garaiko produktu ekologikoekin luntxa emango da.