Maider Huizi, Amaia Irazustabarrena, eta Unax Pagola Donostiako Aste Nagusian jokatutako Master Kirola Txartela Txapelketan aritu dira, eta txapelak Hernanira ekarri dituzte.
Larruzko paletarekin, emakumezkoetan, aurrez aurre aritu dira Maider Huizi eta Amaia Irazustabarrena; Galdos izan zuen bikote aurrenekoak, eta Erasun, bigarrenak. Finalean, oso partidu berdindua jokatu zuten. Aurreneko seta, 4 eta 8, Irazustabarrenaren aldekoa izan zen. Bigarrena eta hirugarrena, berriz, 8 eta 6, Huiziren aldekoa. Laugarrena, 7 eta 8, Irazustabarrenaren aldekoa, eta bosgarrena ere bai, 6 eta 8. Horrela, 2 eta 3, Irazustabarrena eta Erasun izan ziren txapeldun.
Partidua «ikusgarria» eta «gozatzekoa» izan zela ziurtatu dute zaleek, eta eitb.eus webgunean ikusi daiteke.
Bestalde, Pagolak mutilen jubenilen mailan hartu zuen parte. Ponce izan zuen bikote, eta Zumeta eta Mutuberria, arerio. Hernaniarra izan zen txapeldun, 35 eta 24.
Bukatzeko, palaren alde aritutakoei omenaldia egin zieten; tartean, finalean aritutako palista hernaniarrei eta Garbiñe Tijerori. Sariak Gloria Agirrek, Txikita de Aizarnak banatu zituen.