Testu liburuen bigarren eskuko azoka jarriko du martxan Kronikak. Gaurtik, hilaren 23ra arte, Hernaniko Larramendi 11 kaleko bulegoan utzi ahal izango dira dagoeneko behar ez diren, baina oraindik ere etxean gordeta dauden eskolako testu liburuak.
Ondoren, abuztuaren 26tik irailaren 6ra arte, merke-merke erosi ahal izango dira.
Armairuak hustu eta Kronika lagundu
Azoka honekin hiru helburu jarri ditu Kronikak: batetik, armairuak hustutzen lagundu eta testu-liburuak berrerabiltzeko aukera ematea; bestetik, liburuak merke erosteko aukera ematea; eta, azkenik, Kronikari laguntzea.
Astigarraga eta Hernaniko ikastetxeetako eskola liburuak jasoko dira, Lehen eta Bigarren Hezkuntzakoak, nahiz Batxilergokoak. Liburuak ekartzen dituenaren datuak jasoko dira, eta hartara, ondorengo azokan liburuak salduz gero, dagokiona ordaintzeko harremanetan jarri ahal izango da Kronika berarekin. Zati bat, Kronika laguntzeko gordeko da.
Liburuak saldu ezean, hauek bueltan jasotzeko epea jarriko da, hala nahi dutenek aukera izan dezaten. Gero, hustu egingo da Kronikako biltegia ere.
Azoka, hilabete bukaeran
Eskolako testu-liburuen azoka, berriz, abuztuaren 26tik irailaren 6ra bitartean egongo da jarrita, Kronikan. Bertatik nahi denean pasa eta behar dena erosteko aukera izango du nahi duenak.