Badoa aurrera ETE Liga ere. Asteburu honetan bi estropada jokatuko dituzte Hernani Arraun Elkarteko neskek, eta horrela, beste hiru estropada besterik ez dira geratuko, Liga bukatzeko.
Gaur, I. Zumaiako Ikurrina izango dute jokoan, eta bihar, XXXV. Ondarroako Bandera.
Arratsaldean, Zumaiara
Zumaiako estropada arratsaldeko 18:00etan hasiko da, eta Maialen trainerua bigarren txandan aterako da, Isuntza, San Juan eta Kaikurekin batean. Aurreneko txandan Colindres, Lapurdi eta Ondarroa ariko dira lehian, eta hirugarrenean, Deusto, Tolosaldea, Hibaika eta Zumaia.
1,5 miliako ibilbidea egin behar dute, hau da, 2.778 metrokoa, bi luze eta ziaboga bakarrarekin.
Ondarroara, bihar
Atsedenerako tarte gutxi izango dute neskek, hurrengo estropada bihar jokatuko baitute. Ondarroako Bandera izango da jokoan, 12:00etan.