Udalak bi diru-laguntza deialdi jarri ditu martxan hezkuntza arloari lotuta, eta batean zein bestean, irailaren 30era arte egin daitezke eskaerak. Biak, pasa den ikasturteari lotutakoak dira.
Batetik, 2018-2019 ikasturtean haurreskola batean ibilitako haurren familiak lagunduko dira diruz, eta bestetik, 2018-2019 ikasturtean DBH edota HHI-EPA Astigarragan ikasteko aukerarik ez duten ikasleak, ikastetxe publiko batera egindako bidaien gastuekin laguntzeko.
Irailaren 30era arteko epea
Laguntzak eskatzeko epea irailaren 30era artekoa da, bi kasuetan. Udaletxeko Erregistro Nagusian aurkeztu behar dira eskaera egiteko dokumentu guztiak. Abuztuaren 7ko Gipuzkoako Aldizkari Ofizialean argitaratu dira bi laguntzetarako deialdiak, eta bertan zehazten dira baldintza guztiak eta eskaera egiteko moduak.
Haurreskoletako ikasleen kasuan, Haurreskolak Partzuergokoa den haurreskola batean matrikulatutako haurren familiak lagunduko dira. Bi haur edo gehiago matrikulatuta edukiz gero, bigarren haurraren matrikularen %50 ordainduko zaio, eta hirugarren edo haur gehiagoren kasuan, %100. Familia ugariei dagokienez, berriz, %25.
Garraioaren gastuak ordaintzeko laguntzari dagokionez, DBH eta HHI-EPAko ikasleek herrian ikasteko aukerarik ez, eta kanpoko ikastetxe publiko batera egin beharreko bidaiak ordaintzen laguntzeko izango da. Asistentzia agiriaren arabera, eskola egun bakoitzeko 1,90 euro emango zaizkio ikasleari, baina ikasleko gehienez 100 euroko laguntza emango da.