Bi pelikula ikusteko aukera izango da aurten udako zinemaldian. Hernaniar batzuek osatzen duten Potemkin Zinema Taldeak antolatu du laugarrenez, eta gaur eta bihar, film bana jarriko dute, doan, Goiz Eguzki parkean, 22:30etan.
Agnès Vardá zinegilearen 'Visages, Villages', hasteko
Aurreneko pelikula gaur jarriko da; orain gutxi zendu den Agnès Vardá zinegile frantsesaren Visages, Villages. Jean René argazkilari eta artista grafiko gaztearekin egiten du bat zuzendariak, eta bidaia bat egiten dute, herriak, biztanleak eta abar luze bat aurkitu eta ezagutzeko.
Bihar, Raúl de la Fuentek eta Daniel Nenowek zuzendutako animazioko pelikula jarriko dute: Another Day of Life.
Biak jatorrizko hizkuntzan jarriko dituzte, azpititulatuta. Parkean, aire librean ikusi ahal izango dira, baina euria eginez gero, Goiz Eguzkiko ekitaldi aretoan emango dira pelikulak.
Aurretik, afaria
Zine saioen aurretik Goiz Eguzkiko tabernan afaltzeko aukera izango dela gogorarazi dute, 20:30etatik aurrera. Etxeko pizzak ere izango dira.