Hasiera ofizialaren aurretik sartuko dira goizuetar gazteenak festa giroan: igande hau, hilak 11, Umeen Eguna izanen da, eta Goizuetako fiestei hasiera ofiziala emanen dien txupinazoa, berriz, hilaren 14an botako da.
Ikuskizunak, umeentzat
Igandean goizean goiz sumatuko da festa giroa. Izan ere, aurorak, Umore Ona koruaren eskutik, goizeko 08:00etan aterako dira. Gero, Irumaita txarangak jarriko du musika gehiago herrian zehar, 09:00etan abiatuta.
Igandea izanik, goizeko 11:00etan meza izanen da, eta haurrek bertako jantziekin hartuko dute parte. Segidan, 12:00etan, pilota partiduak jokatuko dituzte herriko pilota eskolako haurrek, eta goiza borobiltzeko, umeen bazkaria eginen da ikastolan, 14:00etan.
Arratsaldean, herri kirol ikuskizuna izanen da 16:00etan plazan, Kulkiren eskutik, eta segidan, haurrentzako berendua, Guraso Elkartearen eskutik. Gero, Txatxariak kale musikarien ikuskizuna izanen da 18:30etan, eta bukatzeko, Goittikiren aldeko bingoa, ikastolan, 20:30etan.