Udara aprobetxatuz, lau eguneko irteera antolatu zuen Mendiriz Mendi elkarteak uztaileko azkeneko astebururako. Picos de Europara joan ziren, ostegunetik igandera bitarte, eta giro paregabean igaro zuten egonaldia.
Ostiral eta larunbatean eguraldiak lagundu ez arren, ez ziren aterpean geratu, eta bide alternatiboak bilatu zituzten: Careseko bidea egin zuten ostiralean;?eta aterpetik Majada de Montora dijoan PR bidea egin zuten, larunbatean.
Igandean, gailur bereziena
Eguraldiagatik, hain zuzen, ostegun eta igandean besterik ez zuten gailurra egin. Ostegunean, Coriscao mendia egin zuten; eta mendi bereziarekin bukatu zuten irteera, igandean: Gilbo. «Mendiriz Mendiko ikurran Cervino mendia azaltzen da; eta Gilbo mendia Cervino leones bezala ezagutzen da», azaldu dute elkarteko kideek.