Hernani eta Astigarraga zeharkatuko ditu gaur Donostiako Klasikoak

Gaur jokatuko da, Do­nos­tiako Klasikoa txirri­ndularitza proba ezaguna. Emakumeen proba berria izango da goiztiarrena. 127 kilometroko ibilbidea egin­go dute haiek, goizeko 10:15e­tan Donostiatik abiatuta.  Goi­ze­ko 10:20ak aldera pasako da Herna­nitik, eta jarraian sar­tuko da Astigarragan,  10:26ak aldera. 

Gizonezkoen proba eza­gu­na, aldiz, 227 kilo­metrokoa izan­go da, eta Donostiatik 11:49etan abiatuko da. Hori horrela, aurreikusten dute 14:15ak alde­ra igaroko dela Hernanitik, eta ondoren, 14:20­ak aldera, Astigarragatik. 

Sarrera, modu ezberdinean

Emakumeen txandan, Erre­kal­detik sartuko dira Herna­nira, ibilbide hau eginda: Chilli­da-Leku, Galarreta, Sor­gin­­txulo, Latsunbeberri, Zin­ko­enea, Ibaiondoko erro­tonda, Akarregi eta azkenik, Martin­degi. Segidan sartuko dira Astigarragan, Ergobia eta Do­nos­tia ibilbideetan barrena, Pelo­tari kalea hartuko dute, eta Kale nagusi­tik abiatuko dira, Peru­renara bidean. 

Gizonezkoak, berriz, Urnie­tatik iritsiko dira Hernanira, baina Txantxilla auzoan au­rrera jarraitu eta Sorgin­txulon sartuko dira herrira, bertatik, emakumeen ibilbide berbera egiteko. 

Kaleak itxita, Hernanin

Donostiako Klasikoa pasa baino lehenago itxiko dituzte kale eta errrepideak Her­na­nin. Emaku­mez­koak pasa baino 30 minutu lehenago itxiko dituzte kaleak, goizean, hau da, 09:50ak aldera. Gizo­nezkoena, aldiz, 14:20ak alde­ra pasako da, eta 45 minutu lehenago itxiko dira kale eta errepideak. Astiga­rra­gan pro­ze­dura bera jarraituko dute. 

Hori dela-eta, Hernaniko JOCC taldeak adierazi du,  «ahal dela, goizeko 09:30ak baino lehen eta 10:30­etatik aurrera» ateratzea errepidee­tara. Eta eguerdian ere, gauza bera: trafikoa mugatua egon­go da herrigunean 13:00ak eta 14:30ak bitartean, txirrindula­rien errit­moaren arabera.

Zaintza lanetan, JOCC eta Mundarro

Bai Hernaniko JOCC txirrindularitza taldea, baita Astigarra­gako Mundarro Kirol Elkartea ere antolakuntzarekin lanean aritu dira zaintza-lanak egiteko.  Hori horrela, Urumea bailarako bi herrietako taldeak bidegurutzeen zaintza-lanez arduratuko dira gaurkoan, «ibilgailuek lasterketa baldintzatu ez dezaten».

Herritarrek lan hori egiteko aukera izan dute; izan ere, boluntario bila aritu dira bi taldeak, azken asteotan. 

Animatzera joateko gonbitea, herritarrei

«Aspaldiko partez» lasterketa herrigunetik pasako dela-eta, Hernaniko JOCC taldeak gonbitea luzatu die herritarrei, lasterketak he­rria gurutzatzen ikusteaz go­za­tzeko: «Herna­niko txirrindularitza zaletu guz­tiak, eta hain zaletuak ez direnak, animatu nahi zaituztegu bi lasterketa hauek he­rrian ikustera; batez ere 10:15e­tan, aurreneko aldiz pasako den emakumeen trope­lari animoak helaraztera».

Gaur beraz, Hernaniko eta Astigarragako kale eta errepideetatik, Donos­tiko Klasikoak daramaki lekukoa.