Donostiako Klasikoa jokatuko da Gipuzkoako errepideetan biharko egunez. Aurten, gainera, nobedade batekin: lehen Emakumezkoen Donostiako Klasikoa ikusi ahal izango da. 126,7 kilometroko ibilbidea osatu beharko dute neskek; gizonezkoek, aldiz, 227 kilometroko ibilbidea osatu beharko dute.
Aspaldiko partez, gainera, Hernani eta Astigarraga zeharkatuko du gizonezkoen lasterketak, eta oraingo honetan, baita emakumezkoenak ere. Emakumezkoen lasterketa goizeko 10:15etan abiatuko da Donostiatik; eta aurreikuspenen arabera 10:26etan eta 10:31etan pasako dira Hernani eta Astigarragatik.
Gizonezkoena, aldiz, 11:49etan abiatuko da, eta 14:15etan sartuko da Hernanin. Handik, Astigarragarantz egingo du, 14:25ak aldera.
Hori dela-eta, trafikoan aldaketak izango direla aurreratu dute. Hernanin, adibidez, zenbait kale itxi egingo dira, hala nola, Chillida Leku, Galarreta, Sorgintxulo, Latsunbeberri, Zinkoenea, Ibaiondoko biribilgunea (Karabelgo gasolindegikoa), Akarregi eta Martindegi. Kale hauek goizean itxiko dira, 09:30etatik 10:30etara eta goizean itxitako kaleez gain, eguerdian ere, 13:00etatik 14:30etara, Mandazubiko biribilgunea eta Axala ere itxi egingo dira.