Beste esperientzia bat bizitzeko aukera eskaini nahi die Nagore Legarreta argazkilari hernaniarrak argazkigintza gustuko dutenei.
Beste hainbatetan egin duen moduan, argazki-bidaia egingo du abenduan, oraingo honetan, Gran Kanariara. Abenduaren 3tik 8ra egingo du, eta harekin joan nahi duenak astelehenera arte dauka aukera izena emateko.
Horretarako, baita informazio gehiagorako ere, Legarretarekin berarekin jarri behar da harremanetan: nagore.legarreta@gmail.com.
Ricardo Montesdeoca kanariarrarekin batera
Ricardo Montesdeoca argazkilari kanariarra ere, bertan izango da, Legarretarekin batera. Legarretak berak azaldu duenez, «argazkilaritzarekin esperimentatzeko aukera izango da egun hauetan, bai digitala edo analogikoa. Izan ere laborategi bat eta beharrezko materiala izango da erabiltzaileen eskura...».
Baina ez hori bakarrik, «irlako paisai, eguraldi, jaki eta bertako kultura eta historia ezagutzeko aukera izango da», azaldu du.
Legarretaren proiektua, aukeratua
Bitartean, lanean jarraitzen du Legarretak haren proiektuetan. Duela egun batzuk jakinarazi du Alkizako Sormen Kabia deialdirako berak aurkeztutako proiektua aukeratu dutelako. «Pozik» agertu da, eta aurreratu du «natura eta bertako biztanleak lotzen dituen proiektu parte-hartzailea» izango dela, «biztanleek haien inguru-naturarekin dituzten lotura emozionalak azaleratzen lagunduko duena, esperimentazioa, sormena eta ekintza ardatz hartuta».