Ikasturteko azkeneko plenoa, eta legegintzaldi berriko bigarrena, egin zuen Astigarragako Udalak pasa den asteartean, eta dagoeneko hartu dute erabaki bat: Garbitania enpresa publikoa uzteko erabakia baliogabetzea. Horren inguruan, bere iritzia eman du EAJ-PNV udal taldeak prentsa-ohar baten bidez.
2018ko maiatzaren 18ko erabakia
Udal talde jeltzaleak dioenez, «2018ko maiatzaren 30ean, EAJ-PNV eta PSE-EEren arteko akordioari esker hartutako erabakia baliogabetu du udal gobernuak». Azaldu dute, baita ere, Astigarraga eta Garbitaniaren harremana zein zen, haien hitzetan: «Garbitania enpresa publikoa 2010ean sortu zuten EH Bilduren gobernua zuten Hernani, Oiartzun eta Usurbilgo Udalek atez ateko sistema kudeatzeko asmoz. 2013an EH Bilduren gobernuak atez ateko sistema bultzatu zuen Astigarragan, hondakinen inguruan hitz emandako galdeketari uko eginez. EH Bilduren aldebakarreko erabakiz, Astigarraga Garbitanian sartu zen: 99.000 euroren truke erosi zituen akzioak, eta hondakinen bilketa esleitu zion, urteko 400.000 euroko kostuarekin. 2014an, EH Bilduren Udalak, Oiartzunek enpresa utzita, akzio gehiago eskuratu zituen beste 22.000 euroren truke».
«Garbitaniak ez zuen zentzurik»
Aurreko legegintzaldian, «EAJ-PNVk lana egin zuen hondakinen gaia erregularizatzeko». Eta azaltzen dute: «Herri galdeketa egin genuen eta astigartarrek erabaki zuten ez zutela atez ateko bilketarik nahi». Hortaz, onartzen dute: «Edukiontziak jartzearekin, Garbitaniak ez zuen zentzurik».
Hori horrela, «EAJ-PNVren gobernuak bilketa berria San Markos Mankomunitateari esleitu zion, urteko 300.000 euro aurreztuz: Garbitaniako 400.000 euroetatik, 100.000 euro baino gutxiagora». Argi diote: «Garbitania EH Bilduren hondakinen txiringitoa da».
«EH Bilduren kapritxoak 121.000 euroko kostua du jada»
Haien zalantzak ere badituzte: «Alkate berriak edukiontziekin jarraituko dute adierazi arren, ez dugu ahaztu behar Garbitania atez ateko sistema kudeatzeko sortu zuela EH Bilduk». Gaineratu dute: «gobernuaren aurreneko hilabetean, EH Bilduren kapritxoak 121.000 euroko kostua du jada: Garbitanian jarraitzea zentzugabea da».