Donostiako Klasikoa herritik pasatzean laguntzeko, jende bila

Datorren larunbatean jokatuko da, Donostiako Klasikoa txirrindularitza proba ezaguna; eta hainbat nobedade izango ditu aurten. Aurrenekoa, ema­kumeen proba (127 kilometrokoa) ere izango dela estreinakoz: goizeko 10:15etan abiatu, eta 10:26etan dago au­rrei­ku­sita Hernanitik pasatzea, eta 10:31etan Astigarragatik.

Gizonezkoen proba (227 ki­lometrokoa), berriz, 11:49etan abiatuko da, eta tro­­pelaren abiaduraren araberakoa izango da, Hernanitik eta As­tiga­rra­ga­tik pasatzeko ordua: gu­txi gorabehera, 14:20etan eta 14:25etan, hurrenez hurren.

Herrigunea zeharkatuko dute lasterketek, bi herrietan

Beste nobedadea, Hernani eta Astigarragari dagokie. Izan ere, herrigunea zeharkatuko dute lasterketek, bi herrietan.

Emakumeen proban, Erre­kal­detik sartuko dira Her­na­nira: Chillida-Leku, Galarreta, Sorgintxulo, Latsunberri, Zin­ko­enea, Ibaiondoko errotonda, Akarregi eta Martindegi. Or­du­­an sartuko dira Astigarragan, eta Ergobia eta Donostia ibilbideetan barrena, Pelotari ka­lea hartu, eta Kale Nagusitik abiatuko dira Perurenara bi­de­an. Gizonezkoak, berriz, Urnie­­tatik iritsiko dira Hernanira, bai­na Txantxillan aurrera ja­rraituko dute, Sorgintxulon sar­­tu eta bertatik emakumeeen ibilbide bera egiteko.

Lasterketak pasa baino dezente lehenagotik itxiko di­tuzte kale eta errepide horiek, trafikoarentzat. Hori horrela, Hernaniko JOCC taldeak na­bar­­­mendu du, garrantzitsua dela bezperatik ondo planifikatzea, kotxez zein autobusez egin be­harrekoak; eta ahal dela, goi­zeko 09:30ak baino lehen eta 10:30etatik aurrera egitea. Ber­din eguerdian; autoek mu­ga­tua izango dute herrigunean mugitzea, 13:00ak eta 14:30ak bitartean, txirrindularien errit­moaren arabera.

JOCC eta Mundarro, bidegurutzeetan

Lasterketek bi herriak zeharkatzen dituztenean, JOCC txirrindularitza taldea eta Mun­darro kirol elkartea ariko dira bidegurutzeetako zaintza la­ne­tan. JOCCek azaldu du, taldeko 30 bazkide daudela prest lanerako, baina bazkide ez di­renen laguntza ere eskertuko dutela. Hortaz, Hernaniko bide­gurutzeetan la­guntzeko prest da­go­­enak emailez idatzi de­za­ke, jocczikunako@gmail.com helbide elektronikora.

Mundarrok, berriz, bilera egin zuen uzatailaren 19an, la­gundu nahi zutenekin; baina boluntario izan nahi duena, kirol elkartearekin harremanetan jarri daiteke. Bi txanda antolatu dituzte: aurrenekoa goizez, 09:30etatik emakumeen lasterketa pasa arte; eta bi­garrena eguerdian, 13:00etatik gizonen lasterketa pasa arte.

Lasterketa ikustera gerturatzeko gonbitea, herritar guztiei

«Aspaldiko partez» lasterketa herrigunetik pasako dela eta, JOCC taldeak gonbitea luzatu die herritarrei, lasterketak he­rria gurutzatzen ikusteaz go­za­tzeko: «Hernaniko txirrindularitza zaletu guztiak, eta hain zaletuak ez direnak, animatu nahi zaituztegu bi lasterketa hauek herrian ikustera; batez ere 10:15etan, aurreneko aldiz pasako den emakumeen trope­lari animoak helaraztera».