Gaur jokatuko dira, Hernaniko kiroldegiko frontoian, Zikuñaga Papelera Torneoko finalak; eta etxean, ez da faltako esku pelotari hernaniarrik: herriko bost ariko dira, hiru finaletan.
Kadete mailakoan, hasteko, Oiartzabalek jokatuko du, Pagazpeko Albeniz IIrekin, Perurena tolosarraren eta Iriarte añorgarraren kontra. Partidu berdindua espero da, antzeko ibilbidea egin baitute txapelketan: zailtasunen bat izan zuten ligaxkan, baina erraz nagusitu ziren semifinaletan.
Jubeniletan, berriz, Salaberria eta Zugasti hernaniarrek bilatuko dute txapela, Oiarpeko Aranburu eta Zalakainen kontra. Berdindua espero da hori ere: sasoi onean dauden bi bikote, jokatutako partidu guztiak irabazi dituztenak.
Eta seniorretan, azkenik, ezustekoa bilatuko dute Urkizu eta Labaka hernaniarrek, Etxezarreta eta Odriozola faboritoen kontra. Gazteleku taldekoak txapela jantzi zuen iaz, eta etorkizun haundiko atzelaria da Zazpi Iturrikoa. Bi bikoteek irabazi dituzte partidu guztiak, baina hernaniarrek aurrerapauso bat eman beharko dute haien jokoan, txapela janzteko.
Denboraldia ixteko, Pelota Sailaren festa
Gaurko jaialdia izango da denboraldiko azkeneko lehiaketa eguna, CD Hernaniko Pelota Sailarentzat; eta horregatik, festa bat izatea nahi dute: «pintxopotea prestatu dugu, klubeko pelotari guztientzat, senideentzat, eta denboraldi osoan zehar fideltasunez jarraitu gaituzten zale guztientzat. Hernaniko pelotarentzat egun polita izango da», aurreratu dute.