Asteartean egin zuen Astigarragako Udalak, ikasturteko azkeneko Plenoa. Eta hiru gai izan ziren, bereziki esanguratsuak. Garbitania Zero Zabor elkarte publikoari buruzkoa izan zen aurrenekoa: Garbitaniatik ateratzeko bidea hasi zuen Udalak aurreko legegintzaldian, baina prozesua likidatu gabe zegoen; eta orain, erabaki hura atzera bota, eta Garbitanian jarraitzea proposatu du Udal Gobernu berriak: «ez daukagu hondakin bilketa sistema aldatzeko asmorik, baina Garbitanian jarraitzeak aukera ematen digu, eskaintzen dituen beste zerbitzuak aztertzeko, kale garbiketa adibidez», azaldu zuen Xabier Urdangarin alkateak. EH?Bilduren aldeko botoekin onartu zen, eta kontra agertu ziren EAJ eta PSE-EE.
PSE-EEko Mikel Duranek adierazi zuen, «erdipurdikoa» izan dela likidazio prozesuaren kudeaketa, baina edozein kasutan, erabakia atzera botatzearen kontra dagoela. EAJko Nerea Zusberrok, berriz, «atzerapauso izugarria» dela nabarmendu zuen: «aukera zeneukaten, inposatu zeniguten atez atekoaren kapitulua ixteko. Eta nahiz eta esan ez duzuela berriro ezarriko, Garbitaniari eutsita jarraitu nahi duzue».
Brigadarentzako lokal berria erosteko, kreditu gehigarria
Ibai parkearen izenari buruzkoa izan zen hurrengo gaia, eta azaldu zuten, aurrez emandako izena aztertuta eta herritarren ekarpenak jasota, idatzizko forma estandarrera egokitu dutela. Hori horrela, Andre Gobalarien Parkea izatea proposatu eta onartu zen, EH Bildu eta PSE-EEren aldeko botoekin, eta EAJren abstentzioarekin.
Eta onartu zuten, baita ere, kreditu gehigarri bat txertatzea aurrekontuan, gerakinetik, Brigadari beste lokal bat emateko: «denbora daramakigu esaten, kiroldegi azpikoa ez dela egokia; eta asmoa da kreditua gehitzea, iraila partean espedientea irekitzeko, lokal berria erosteko», azaldu zuen alkateak. EH Bilduren botoekin onartu zen, abstenitu egin zen PSE-EE, eta kontra bozkatu zuen EAJk. «Ulertzen dugu presa, baina ez da egiteko modua; batzorde batetik pasa behar zuen gaiak», adierazi zuen Zusberrok.
Azkenik, aho batez erabaki zen bi zerbitzuren kontratatuak esleitzea: etxez etxeko laguntza zerbitzuarena, eta babestutako etxebizitzetako erabiltzaileei laguntzeko zerbitzuarena. Bietan, Arreta Zerbitzuak enpresak egin du eskaintza onena, eta berari esleitu zaio.