Laburra izan zen asteartean egin zuten ezohiko Plenoa, Hernaniko Udalean. Baina izan zen eztabaida, puntuetako batean:?EH Bilduren aldeko botoekin onartu zen, zinegotzien ordainsarietan eta dedikazioetan aldaketa egitea; eta kontra azaldu zen oposizioa.
«Aurrekontua Gauzatzeko Arauaren 11garren artikulua da egokitu behar dena, 20.000 biztanletik pasa delako herria. Horrekin, guztira 10 liberazio osorentzako baimena jaso da arauna, legeak dioenera egokitzeko: alkatearena, Gobernu Taldeko sei zinegotzirena, eta oposizioko hiru zinegotzirena. Horrek ez du esan nahi, guztiak gauzatuko direnik», azaldu zuen Xabier Lertxundi alkateak. Eta zinegotzien ordainsariak ere egokitu dira: 35.000 euro inguru Gobernukoek, eta 31.900 inguru oposiziokoek.
EAJko Andoni Amonarraizek kritikatu zuen, ez dela negoziaziorik izan; Udal Gobernuak atzera bota dituela oposizioaren proposamenak, bere ideiatik mugitu gabe. Eta adierazi zuen, «oposizioko zinegotziak diskriminatuta» daudela, ezarri zaien ordainsariarekin.
PSE-EEko Ricardo Crespok ere, nabarmendu zuen ez dela justua, soldata haundiagoa izatea Gobernuko zinegotziek, oposiziokoek baino; eta ez dela proportzionala, hauteskunde emaitzei erreparatuz, ezarri den liberazio kopurua.
Ondoren, onartu zen, baita ere, behin behineko komunikazio arduradun lanpostu bat sortzea Udaleko plantillan. EH Bildu eta Elkarrekin Podemos azaldu ziren alde, eta abstenitu egin ziren EAJ eta PSE-EE.