GAURTIK igandera arte, Santioek herria piztuko dute, Astigarragan. Txikienen txupinazoak giroa berotuko du eguerditik, baina jaien hasierako txupinazoa arratsaldean botako da, udaletxeko balkoitik. Eskubaloi, futbol, herri kirol, pilota eta saskibaloi taldeetako neskak izango dira pregoia irakurri eta jaien hasierako suziria jaurtiko dutenak; herritarrek emakume kirolarien meritua txalotu nahi izan dute, eta horregatik izango dira protagonista.
«Haur, gaztetxo, gazte, heldu, adineko... denontzako jaiak dira»
Aurtengo Santioen egitaraua zabala da, eta gerturatzen den guztiak izango du gozatzeko aukera, Astigarragan. Musika, dantza, kirola, ikuskizunak edo ohitura zaharrak gogoratu eta entzungo dira datozen bost egunetan.
Gaurko eguna txikienek aprobetxatuko dute gehien, ziurrenik. Eguerdian txupinazoa botako dute, eta herri bazkari guztien ondoren, Honolulu Kantu Kolore taldearen ikuskizun musikala izango da, 16:30etan. Tartean, txokolate jatea antolatu du Xaguxar elkarteak, Foru Plazan. Eta arratsaldeko txupinazo nagusiarekin batera, erraldoi eta buruhaundien txanda izango da. Baina bihar ere, haurrentzako jolasak antolatu dira Pelotari kalean, eta Kart eta Quad pistak izango dira, 10 urtetik gorakoentzat. Gainera, Txu-Txu trena herrian barrena ibiliko da, egun osoan zehar.
Ostiralean denetarik izango da, Santiotan. Goizean goizetik Iturengo Joaldunek esnatuko dute herria, eta eguerdira arte izango dira rockodromoa eta tirolina, umeentzat; eta sagardo dastaketa edota bertsolariak, besteak beste. Eta nola ez, herri bazkariek segida izango dute, ostiralean ere bai: Santa Anakoa eta Elkartasunekoa izango dira, musikariek girotua. Arratsaldean festak jarraituko du txarangarekin, eta hegaluze eta Gernikako piperren parrilladarekin.
Baina Santiotako nobedade nagusia larunbateko danborrada da, 18:00etan. Denetarik izango da egun honetan: 3x3 saskibaloi txapelketa, marmitako lehiaketa arrakastatsua, elektrotxaranga, bingoa edota zirku ikusikizuna. Ez da aspertzeko astirik izango, egun osoko ekitaldi eta musika emanaldiekin.
Azken eguna da igandekoa. Adin guztietarako ur-parkea antolatu da Foru Plazan, goiz eta arratsalde. Eta musikari eta dantzariez gain, janari dastaketa eta Playback lehiaketa ere izango dira, arratsalde horretan. Zezensuzkoaren ondoren, Laiotzek emango die bukaera jaiei.
Gazte Asanbladak lan polita egin du, Santiotako egitarauan
Herriko festak antolatu dituztenak asko izan dira, eta «jende askok egin du lan musutruk jaien aurretik, dena prestatzen», nabarmendu dutenez. Gazte Asanbladak ere egin du berea, aurtengo egitarauan. Udalarekin batera adostu eta prestatu dute plangintza, eta txozna-gunea girotzen arituko dira, egunero.
Bestalde, antolatzaile guztiek argi utzi dute jai parekideak nahi dituztela, eta ez dela inolako eraso sexistarik onartuko: «festa lasai eta askatasunez egitea nahi dugu», adierazi dute.