Orion jokatu zen, igandean, ETE Ligako zazpigarren estropada; eta bertan, ezin izan zion eutsi Hernaniko Maialen traineruak, bezperan Sestaon lortutako emaitza onari. Bizkaiako uretan bosgarren izan bazen, zortzigarren postura erori zen Hernani, Orion.
Hiru txandatatik, bigarrenean aritu zen Maialen, San Juan, Kaiku eta Isuntzarekin batera; eta aurretik izan zituen hiruak. Aurrea hartu zioten, hirugarren txandako lau faboritoek ere: Zumaia nagusitu zen. Ondarroa, Lapurdi eta Colindres utzi zituzten atzetik, hernaniarrek.
Igandeko emaitzarekin, ligako zazpigarren postura jaitsi da berriro Hernani, Isuntzak aurreratuta; eta bi puntura gerturatu zaio San Juan.
Aste honetan, beste bi jardunaldi izango dituzte: ostegunean Lekeition ariko dira, eta larunbatean Colindresen.