Maila ederrean aritu dira beste behin, Urumea bailarako txirrindulari juniorrak. Eta horren erakusle da, Enekoitz Azparren astigartarrak lortutako garaipena: Arantzazuko Igoera irabazi zuen larunbatean.
70 kilometroko lasterketan, hasieratik sartu zen ihesaldian Azparren, beste bost lagunekin; eta haiei batu zitzaizkien beste 14, tartean Telmo Semperena herrikidea, probaren erdialdera. Haien artean jokatuko zuten garaipena, eta Azparren izan zen indartsuena, iheskide guztiak atzean utzi eta bakarrik helmugaratuta. Ibai Rodriguez hernaniarrak, aldiz, atzetik aurrerako bidea egin zuen tropeletik, eta iheslari batzuk gaindituta, zazpigarren izan zen. Bederatzigarren sailkatu zen Semperena.
Jaime Romero Europako Txapelketan, Belgikan
Proba gehiago izan zituzten bailarako txirrindulariek, aurreko asteburuan. Horrela, Belgikako Gante hirira joan zen Jaime Romero astigartarra, Espainiako selekzioarekin, pistako Europako Txapelketara.
Zorte haundirik ez zuen izan, ordea. Taldekako persekuzio proban zazpigarren egin zuten aurreneko kanporaketan, baina ondoren, Italiaren kontrakoan, lau taldekideetatik hiruk elkar ikutu eta erori egin ziren. Zortzigarren bukatu zuten, beraz, kanporatuta.
Horren ondoren, banakako persekuzio proba lehiatu zuen Romerok, eta 16garren eginda, ez zen kanporaketak lehiatzeko sailkatu. Eta azkenik, madison proban aritu zen astigartarra, Markel Rodriguez bizkaitarrarekin bikotea osatuta; eta 13garren postua lortu zuten.
Errepidean, berriz, Kantabriako Zirkuitua itzulia lehiatu zuten Enekoitz Azparrenek eta Ibai Rodriguezek; bi etapa eta erlojupeko bat, ostiralean eta larunbatean. Maila onean aritu ziren biak. Azparren zazpigarren izan zen erlojupekoan, eta erregularrago aritu zen Rodriguez, egunero onenetatik gertu ibili eta sailkapen nagusian 34garren bukatuz.
Hurrengo egunean, Zumarragako proban aritu ziren biak, Semperenarekin batera. Eta hasieratik osatu zen, garaipena lehiatuko zuen taldetxoa. Horien artean zen Semperena, baina Antiguara igoeran ezin, eta 8garren bukatu zuen. Azparren 12garren izan zen, eta matxura baten erruz, erretiratu behar izan zuen Rodriguezek.