Jada aurkeztu du Astigarragako Udalak aurtengo jaien egitaraua, eta ez da aspertzeko astirik izango, Santiotan. Xabier Urdangarin alkateak, Amaia Usabiaga kultur teknikariak eta Aintzane Barandiaran eta Ione Olatziregi zinegotziek eman zuten egitarauaren berri, eta haur, gazte zein helduentzat ondo pasatzeko ekintzak eta egitekoak antolatu dira.
Aurtengo pregoiean neska kirolariak izango dira protagonistak, «merezi dutelako eta egin duten ahalegina herriko plazan txalotu nahi dugulako», azpimarratu zuen Urdangarin alkateak, jaien aurkezpenean. Azken urteotan loraldia izan da, kirol taldeetan; eskubaloiko taldea edota futbolekoa sortu dira eta marka bikainak lortu dituzte futbolari eta eskubaloikoek, gainera. Saskibaloi taldea, Emarri eta palakoa ere bertan omenduak izango dira txupinazoa botatzean.
Egitarau zabala, Santiotan
Jaiei 24ean emango zaie hasiera, baina asteburu honetan hasiko dira astigartarrak motorrak berotzen. Uztailaren 20 eta 21erako herrian egin ohi diren ekitaldiak bildu dituzte; besteen artean, herri krosa, sardina jatea, kontzertua eta jaialdia egongo dira.
Santiotako aurkezpenean azpimarratu zuten bazkari herrikoi ugari izango direla aurten ere; haurrena, erretiratuena, gaztelekukoa, gazteena, marmitakoa, elkartasunekoa, Santa Anakoa... guztiek izango dute izena festetan. Bestalde, ohiturak gogoratzeko eta gaurkotasuna ospatzeko ekintzak ere izango dira, herri kirolak, euskal dantza, eta kale ikuskizunekin.
Mota guztietako musika entzungo da jaietan. Txarangak, erromeriak, kotzertuak, musika ibiltariak edo dantzarako doinuak izango dira. Gazteek, beren aldetik, eskaintza alternatiboa egin dute txoznetan, hainbat kontzerturekin. Urteroko taldeak eta berriak ere izango dira aurten, herria pizten: Ilargi Beltza, Modus Operandi, Ana Lea & Maria, Blessive DJak, Abiba diskofesta eta Laiotz.
Bost egunetan parte hartzeko aukera ugari izango da, guztientzat. Txikienek jolasak izango dituzte, eta saskibaloi txapelketa, krosa, Larrain dantza, bola eta toka ere izango dira, beste askoren artean. Jarduera gastronomikoak ere lekua dute Santiotan, sardina jate, hegaluze pintxo eta sagardo dastaketarekin. Baita Marmitako Lehiaketa arrakastatsua ere. Zozketa egin behar izan da. Eta ikusle edo entzule gisa egoteko aukera ere egongo da Rojo Telonen zirkoa, Jule kale antzerkia eta Tio Teronen dantza ikuskizunarekin.
Horrez gain, feria, barrakak, txoznagunea eta kaleko salmenta postu ibiltariak ohiko lekuan jarriko dira. Gainera, barrakek uztailaren 26 eta 29an prezio berezia izango dute, bidaia euro batean izango baita.
Aurtengo nobedade nagusia, danborrada
Santio jaietan herri danborrada egingo da aurten. Garai batean egin izan zen eta 75 herritarrek bertan partehartzeko izena eman dute. Larunbatean izango da, 18:00etan. Azkeneneko inauterietan Inude eta Artzaien konpartsan danborrada egin zuten, eta partehartzaileei gogoa piztu zitzaien eta jaietakoa ere berreskuratu dute. Izenematea irekita dago oraindik.
Jai parekideak, oinarri
Hainbat iniziatiba jarri direla martxan ohartarazi zen aurkezpenean: eraso sexisten atentziorako 24 orduko arreta zerbitzua 638 206 586 telefono zenbakian, Sexu-bizi sexologo-aholkularia uztailaren 24, 25 eta 27an, familiei zuzendutako Beldur barik gunea 25ean, eta Brigada Morea ere egongo da etxera itzultzeko.