Espainiako Txapelketak jokatu ziren aurreko asteburuan, zenbait kategoriatan. Eta Hernanik ere izan zuen ordezkaritza, horietan.
Kataluniako Granollersen aritu zen Aitor Urkia, 20 urtez azpikoan, mailu jaurtiketan. Eta emaitza bikaina lortu zuen hernaniarrak: 67,69 metrora jaurti zuen 6 kiloko mailua, eta bigarren sailkatu zen, zilarrezko domina kolkoratzeko. Bartzelonako David Martinek bakarrik hartu zion aurrea, 69,17 metroko jaurtiketarekin.
Asturiaseko Gijonen zeukan zita, bere aldetik, Amaiur Velezek, 16 urtez azpiko txapelketarekin. 300 metro hesidunetan aritu zen hernaniarra, eta 47,64 segundutan gelditu zuen kronometroa, semifinalean, bere serieko laugarren izateko. Ez zen finalera sailkatu, baina marka ona lortu zuen Velezek, eta beraz, primerako bukaera eman dio, bere denboraldi bikainari.