Asteazkenean egin zuen urtebete, Jose Maria Setien hernaniarra hil zela, Donostiako gotzain izan zena. Eta bere omenez, hitzaldia antolatu dute Hernanin, datorren asteazkenean, Etikarte eta Oreki Fundazioek, eta Elkarbizi taldeak. Juan Maria Uriartek eskainiko du, Donostiako gotzain izana bera ere; 19:00etan hasita, Sandiusterriko aretoan.
Eta hitzaldiaren berri emateko, aurkezpena egin zuten ostegunean, Maria Setienek, Etikarte Fundazioko lehendakariak; eta Natxo Izetak, Elkarbizi taldeko ordezkariak. Euskal eliza eta berradiskidetzea izango da gaia: «Jose Maria Setienen pentsamenduan, oinarrizko gaia izan zen hori. Eta Uriarte eta Setienen hitzaldietan, bat datoz beraien ideiak, adiskidetzea, bakea, egia, justizia eta elkarrizketari dagokienez», adierazi zuen Maria Setienek. Eta azaldu zuen, «biolentziaren aurrean euskal elizak duen postura zalantzan jarri den une honetan», eztabaida eta foro ezberdinetan ari dela parte hartzen Uriarte.
«Bake sendo batek, beste pauso bat eskatzen du; adiskidetzea»
Maria Setienek berak ekarri zituen gogora, Uriartek esandako hitzak, bere agerraldietako batean: «bake sendo eta gizatiar batek, eskatzen du beste pauso bat; adiskidetzea. Eta horrek bere barnean hartzen du, egindako delituen egia errekonozitzea, biktimentzako justizia, eta hitz egin, barkamena eskatu eta ematea».
«Euskal eliza eta berradiskidetzea izango da hitzaldiaren gaia; Setienen pentsamenduan oinarrizkoa izan zena»
Natxo Izetak, bere aldetik, gogora ekarri zuen, Jose Maria Setien izan zela aurreneko hizlaria, Pako Garmendiarekin, Orekik eta Elkarbizik antolatutako egitarauan, bizikidetzaren alde: «hitzaldi hartan, Setienek adierazi zuen, bakean bizitzeko eskubidea dugula aldarrikatzen dugun bezalaxe, guztiok dugula hura eraikitzeko obligazioa ere, modu batera edo bestera; eta saiatu behar dugula, bake gabeko elkarbizitzara eraman gaitzaketen liskarbide guztiak ekiditen. Ildo horretan egin nahi izan dugu lan, eta guretzat, erreferente morala izan da Jose Maria Setien», adierazi zuen Izetak.
2014an jarri zuten martxan egitarau hori, eta aurtengo programaren parte da, datorren asteazkeneko hitzaldia.
Etikarte Fundazioa, berriz, hiru urte lehenago sortu zuen, 2011n, Jose Maria Setienek berak; eta lehendakari izan zen, bere heriotzara arte. Fundazioa eratu zen ekimenak laguntzeko; aurre egiten dietenak, gizakiaren garapenak planteatzen dituen desafio, espiritutik eta konpromisotik.