ATEZ atekoa eta bosgarren kontenedorearekin EH Bilduk duen jarrerarekin du desadostasuna Hernaniko EAJ-PNVk, eta horregatik esan dio agur Erabaki Hernani prozesuari. Joan den urteko maiatzean prozesu parte-hartzailea martxan jarri zenetik, honen parte izan direla azpimarratu dute, baina onartu ezin diren mugak daudela helarazi dute.
Hori horrela, Hernaniko EAJren bozeramaileak, Andoni Amonarraizek, aditzera eman du EH Bilduk «betoa» jarri diela herritarren bi proposamenei «batek atez atekoa kentzeko eskatzen zuen, eta besteak bosgarren kontentedorea jartzea». Honen inuruan, Amonarraizek gehitu du: «EH Bilduk atez atekoa mantentzea erabaki du, hernaniarrek ezin dute honen inguruan botoa eman, eta dida batean prozesutik ezabatu dute», kritikatu du.
Zentzu horretan, adierazi du «EH Bilduk badaki bosgarren kontenedorearen emaitzak, inguruko herri askotan, Usurbilgo atez atekoaren antzekoak direla eta Hernanin baino hobeak direla. Gainera, aukera hau askoz merkeagoa dela ere badakite. Baina, hala ere, ez dute onartzen Hernanik horren inguruan bozka ematea».
Pasa den prozesuan ere alderdiak EH Bilduren kontrako iritzia azaldu zuen esanez «ez dugu ondo ikusten adin-txikikoek diru publikoarekin zer egin erabaki dezaketela, baina batzuetan amore eman eta aurrera jarraitu behar da».
«Atez atekoa eta bosgarren kontenedorearen inguruko herritarren bi proposamen ez ditu onartu»
«Ez da EAJ-PNV izango herriari bere iritzia ematen galaraziko diona»
Azkenik, EAJko bozeramaileak nabarmendu nahi izan du herri mailako konpetentzia duten gaien inguruan ez dela bere alderdia izango herritarrei beren iritzia ematen galaraziko diona. Horregatik, «ezin dugu babesten jarraitu EH Bilduren helburu politikoekin akatsez beteta dagoen prozesua, ez eta herritarren ezinegon guztiei erantzuna ematen ez dien prozesuari».