Uztailarekin batera indarrean sartu zen astelehenean ogiaren kalitateari buruzko arau berria, Ministro Kontseiluak apirilean errege dekretu bidez onartu zuen araua, hain zuzen ere.
Arau berriak ogi integrala, ore ama eta ohiko ogiak egiteko arau zorrotzagoak zehazten ditu. Ogi integrala egiteko, adibidez, %100 irin integrala erabili beharko da. Erabat integralak ez diren ogien kasuan edo zerealdunetan, irinaren portzentaia zehaztu beharko da etiketan.
Ore amaren definizioa zehazten du arauak, eta ohiko ogiaren definizioa zabaltzen du. Era horretan, orain arte %10eko BEZa zuten hainbat ogi %4koa izatera pasako dira, ogi arruntak izango baitira. Araudiaren arabera, ore amak legami industrial kantitate mugatua izan beharko du eta oso zorrotzak izango dira «ore amarekin egina» etiketa jartzeko baldintzak. Ogi arruntaren orain arteko definizioa aldatzen du gainera arau berriak, eta gari irinaz gain beste irin mota batzuekin egindakoak ere arruntak izan ahalko dira, irin integralarekin egindakoak barne.
Hernaniko okindegietan ez da aldaketarik apenas sumatuko, ez behintzat Sulabe Peña okindegian. «Guri aldaketa gutxi suposatzen digu. Izendapen batzutan egin dugu aldaketa, baina besterik ez. Ez genion integrala deitzen %100 integrala ez zen ogiari. Araudi berri honek aldaketa suposatuko die supermerkatuko ogiari seguruasko».
Ogiaren erosketa, minimo historikoetan
Elikadura kontsumoari buruzko txostenaren arabera, Espainian ogiaren salmentak %2 egin zuen behera iaz, minimo historikoetara iritsita, eta ogi kiloa 2,40 euroan saldu zen, 2017an baino %0,2 merkeago. Jaitsiera horiek direla eta, %2,2 gutxitu zen ogiaren balioa merkatuan.
Ogiak honela banatzen dira: ogi berri integrala, arrunta eta gatzik gabea; eta ogi industrial egin berria eta lehorra. Ogi egin berria da herritarren artean gehien kontsumitzen dena: guztien %23,89. Gutxien kontsumitzen dena, ostera, gatzik gabeko ogi egin berria da.