Hamar batzorde informatibo, eta Plenoak hileko azkeneko astearte arratsaldean

Zehaztu ditu Astigarragako Udalak, legealdi berriko fun­tzio­namendua eta egitura. Joan den asteartean egin zuten au­rre­neko Plenoa, eta bertan onar­tu zituzten, batzorde ezberdinen osaketak, zinegotzien ardurak, eta Pleno eta bileren maiztasun eta datak.

Udal berria osatzeko Ple­no­ko akta eta idazkariaren in­ben­tario txostena onartuta, azaldu zuten hiru udal talde sortu di­rela, EH Bildu, EAJ-PNV eta PSE-EE; eta bozeramaile batzordeak honako osaketa izango duela: Xabier Urdangarin alkatea le­hen­da­ka­ri, eta bozeramaile Esti Neira (EH Bildu), Nerea Zus­be­rro (EAJ) eta Mikel Duran (PSE-EE).

Eta segidan, proposatu eta onartu zuten, Plenoak hileko az­keneko asteartean izatea, arra­tsaldeko 19:00etan, «herritarren partehartze ahalik eta haundiena izateko», alkateak azaldu zuenez. EAJk adierazi zu­en, ez dela «ordutegi egokiena familia eta lana kon­tzi­lia­tzeko», eta abstenitu egin zen, PSE-EE bezala. EH Bildu­ren al­deko botoekin onartu zen.

Hamar batzorde, osatuta

Batzorde informatiboen bi­le­rak, berriz, hileko bigarren as­tean izango dira. Hamar batzor­de osatu dira, eta EH Bilduko zinegotziak izango dira lehendakari, guztietan: Andoni Gartzia, Hirigintza, etxebizitza, ingurugiroa eta mugikortasuna, eta Ogasuna eta ondarea batzordeetan; Aitor Güemes, Obrak, zerbitzuak eta uholdeen aurkako batzordean; Roxali Fernandez, Hezkuntza eta DBHren aldeko batzordean; Ione Olaziregi, Kiro­lak, jarduera fisikoa eta gazteak batzordean; Aintzane Ba­ran­diaran Kultura, euskera eta ja­iak, eta Berdintasuna eta partehartzea batzordeetan; Esti Nei­ra, Gizarte zerbitzuak eta adi­neko pertsonak batzordean; eta Xabier Urdangarin, Komer­tzioa, turismoa eta tokiko ga­ra­pena, eta Kudeaketa eta per­tsonala batzordeetan.

Batzorde guztietan, EH Bil­duk hiru ordezkari izango ditu, eta EAJ-PNVk eta PSE-EEk bana. «Oreka falta» salatu zuen EAJko Zusberrok, baina «egoki» ikusi zuen PSE-EEko Duranek, «Ple­no­an dagoena islatzen duelako. Bestela, zazpi kidera pasa be­har­ko litzateke, eta hori mini-Pleno bat litzateke». Kontra­ta­zio Mahai iraunkor bat sortzea ere adostu zuten, aho batez.

Udalak beste erakundeetan izango dituen ordezkariak ere zehaztu zituzten, eta Zusberrok nabarmendu zuen, «Astigarra­ga Lantzenen izan ezik, EAJ baztertua» izan dela. EH Bilduko Gartziak erantzun zion, aurreko legealdian EH Bildu izan zela baztertua, «EAJk adina zinego­tzi izan arren».

Alkate eta zinegotzien dedikazioari dagokionez, lanaldi osokoa izango du Urdanga­ri­nek, hilean 3.845,13 euroko soldata gordinarekin; eta la­naldi erdikoa EH Bilduko Nei­rak (Alka­te­tzako idazkari eta komunikazio lanak egiteko) eta EAJko Zus­be­rrok, hilean 1.151,92 euroko soldata gordinarekin.

Zusberrok adierazi zuen, soldata «igoera haundia» izango duela alkateak, Zorione Etxe­zarraga aurreko alkatearen al­dean; eta Urdangarinek eran­tzun zion, lehendik duen lanpostuaren maila bereko ordain­­saria izango duela (tokiko ad­mi­nistrazio publikoko goi-mailako eskalako karrerako funtzionarioa da). Gainera, nabarmen­du zuen urtean 129.473,72 eurotik 115.476,70 eurora murriztuko dela alkate eta zinegotzian pertsonaleko kostua, 3,1 lanalditatik bira pasako delako.

Eta alkateordeak ere jakina­razi zituzten, orden honetan: Aintzane Barandiaran, Andoni Gartzia, Nerea Zusberro eta Mikel Duran.

Aurrez prentsa ohar bidez egin bezala, Plenoan ere salatu zuen Zusberrok, «EH Bilduk al­katetza hartu zuenetik, bi astetan alkatetza goizetan itxita» egon dela. Urdangarinek eran­tzun zion, «gezurra borobila» dela hori: «ni abuztuaren 1ean liberatuko naiz, baina hala ere, astean hiru egunetan etorri naiz, astelehen, asteazken eta ostiraletan, goizeko 08:00etatik arratsaldeko 16:00ak edo 17:00ak arte. Hasteko modu txa­rra da gezurretan aritzea, eta espero dut zuen jarrera, legealdi ho­ne­tan, ez dela gezurrean oinarrituko». Zusberrok erantzun zion, EH Bildu ez dela egokiena, «oposizioa nola egin esateko».

Santio jaiak eta Hezkuntza, aurreneko bi asteetako lanak

Aurreneko hamabost egunetako balorazioa ere egin du Udal Gobernuak; eta abiapuntuko egoera ezagutzeko udaleko zerbitzu eta sailekin bilerak egiteaz gain, bi lan nabarmendu ditu. Batetik, Santio jaien antolaketa: «oso epe laburrean, San­tioen antolaketari astindu on bat eman behar izan diogu, gauza asko eta asko zeudelako erabakitzeko eta egin gabe».

Bestetik, Hezkuntzari dagokionez, Haurreskola berria egiteko, Herri Eskola haunditzeko eta DBHko ikastetxea eraikitzeko «espediente, dokumentu eta txosten guztiak aztertzen» ari­tu dira: «orain, Haurreskola egi­teko aurreproiektua aztertzen ari gara, eta proiektua idazteko lehiaketa prestatzen, laster ate­rako dena. Gainera, Hezkuntza Saileko Gipuzkoako Ordez­ka­ri­tza­rekin bilera hitzartu dugu uz­tailaren 9rako, Herri Eskola haunditu eta DBH eraikitzeko proiektuen egoera zein den az­tertu eta lankidetzan hasteko».

Orain, uztailean zehar, bisita-bilerak egingo dituzte Anus­ka eta Santiomendi auzoetara, «hiritartze lanen berri emateko»; eta Kultur Etxe berrira bi­si­tak antolatuko dituzte, herriko kultur eragileekin.

Hurrengo Plenoa, hilaren 23an

Uztailean egingo du Udalak, hurrengo Plenoa. Baina hileko azkeneko asteartean beharrean, hilaren 23ra aurreratu dute, arratsaldeko 19:00etan. Aurre­tik, Ogasun, Hirigintza, Kultura eta Euskera Batzordeak bilduko dira, «presaz atera beharreko gaiak daudelako». 

Abuztuan, berriz, ez da Ple­norik izango.