798 kilometro eta zenbatu ezinezko bizipenekin begi aurrean, piztu zen EuskarAbentura 2019 espedizioa pasa den astelehenean Maulen. 121 partehartzaile (Jzioquitarrek) izango ditu abenturak eta Hernanira uztailaren 18an iritsiko da. Bertan amaituko da hemezortzigarren etapa eta hemeretzigarrena Hernanitik abiatuko da Irun aldera.
Euskal Herria oinez zeharkatzea eta euskararen lurraldeko geografia, kultura nahiz historia lagunartean ezagutzea helburu duen ekimenaren bigarren edizioa izango da. EuskarAbentura 2019 espedizioko ibilbidearen %95 baino gehiagok Donejakue bideko hiru adarretan egiten du aurrera: bide frantsesa Mauletik Vianaraino, barnealdeko euskal bidea Gesaltzatik Iruneraino (kontrako norabidean) eta euskal kostaldeko bidea Baionatik Getxoraino.
50etik gora jarduera eta Hernanin Hiruki Larroxa kolektiboarekin bilduko dira
50etik gora jarduerak aberastuko dituzte hilabete eta 31 etapaz osatutako abentura nomada honetan. EuskarAbentura Elkarteak segurtasun, osasun eta genero berdintasun protokoloak landu dituzte, baita zaborren kudeaketa eta euskararen erabilera sustatzera bideratutakoak ere. Esperientzia ibiltaria edukiz hornituta dago eta etapa bakoitzean ekintza desberdinak antolatzen dituzte. Hala nola. Hernanin amaitzen den etapa Tolosan hasiko dute eta bidean Andoaingo Martin Ugalde parkean geratuko dira Berriara bisita eginez.
Bertan eguerdian, Martxelo Otamendi zuzendariarekin egongo dira eta euskalgintza eta euskarazko hedabideen inguruan ariko dira solasaldian. Behin Hernanira iritsita Hiruki Larroxa kolektiboko Ibai Fresnedorekin elkartuko dira 18:00etan, Sexu eta genero identitate aniztasuna gaia landuz.
Jakoba Rekondorekin, baratze eta basoen inguruan
Hernanin gaua pasa eta gero, uztailaren 19an aterako dira Irun aldera. Bidean, Astigarragan, Jakoba Rekondorekin bertako baratze eta basoen inguruko azalpenak jasoko dituzte eta Oiartzun aldera joango dira Urumea bailarari agur esanda.
Smartphonetan deskargatu daiteke ?Euskarabentura? aplikazioa
Espedizioa lehen pertsonan bizi ezin baina gertutik jarraitu nahi dutenentzat tresna baliagarria izango da Euskarabentura aplikazioa. Codesyntax enpresa hornitzaileak garatu du, eta Android nahiz iOS sistemetarako erabilgarri dago jada eta bertan jarraipen zehatza egin daiteke.