Bigarren urtez jarraian Hernani Errotzenek ikastaroa eskainiko du uztailean zehar. Udako bigarren aurrez aurreko ikastaroa da eta Nabarralde fundazioarekin elkarlanean antolatu dute.
Euskal Herriaren historia gaia hartuta, lau egunetan zehar eta bi ordutako saiotan emango da. Uztailaren 15etik 18ra euskaraz eta 22tik 25era gaztelaniaz, bi ordutako saiotan, 10:00etatik 12:00etara; orotara 8 ordu.
Ikastaroak Hernaniko Biteri kultur etxean izango dira. Beñi Agirre izango da zuzendaria.
Matrikula epeak
Matrikula epeak ondorengoak dira. Uztailaren 12ra arte dago epea euskarazko ikastaroan izena emateko eta uztailaren 18ra arte gaztelaniazko ikastaroetan izena eman nahi baldin bada.
Izena ematea eta informazioa eskuratzeko herriaerrotzen@gmail.com (izen abizenak jarri) helbidera idatzi behar da. Matrikula gauzatzeko e-maila bidali behar da aurrematrikula egiteko eta emandako kontu zenbakian sarrera egin behar da. Ondoren ikastaroaren lehenengo egunan aurkeztu behar da. Matrikula eta materialaren kostua 15 euro dira.
Antzin Arotik gaur egungo errealitateraino
Nabarraldek eskaintzen duen on-line bidezko ikastaroaren laburpena landuko dute ikastaro honetan. Gaiak aditu talde baten zuzendaritzapean garatu dira eta guztien artean osatzen dute Euskal Herriaren kontakizun historiko jarraitua, Antzin Arotik gaur egungo errealitateraino.
Ikastaroa ikus-entzuneko materialez lagunduta emango da
Ikasle bakoitzari testu laburpena emango zaio hasieran. Ikastaro honen bidez, Euskal Herria-Nafarroako historiaren irakurketa orokor eta sintetikoa eskaintzen dute, ikuspegi propiotik landuz eta egun bizi den errealitatean eragiten duten erreferente eta gertaera historikoak azpimarratuz. Edward Said, literatur kritiko eta militante palestinar-estatubatuar idazleak dioen bezala «Herri bati definizioa emateko biderik hoberena, bere historiaren idazketa delako» diote Hernani Errotzenetik.
Ikastaroaren helburuak
Antolatzaileek helburu desberdinak jarri dituzte: «Batetik, gure herriaren historia ezagutaraztea, eta bestetik, parte hartzaileak gaitzea egungo egoera ulertzeko eta etorkizuna garatzeko tresna historiko egokiak izan ditzaten. Historia eta oroimen historikoari buruzko gogoeta sustatzea eta gure historiaren ikuspegi zehatz eta dokumentatua eskaintzea».