Bihar izango da aukera, Alaia Belaunzaran Arruabarrena harpa-joleren musikaz gozatzeko, udaletxeko Areto Nagusian. Arratsaldeko 19:00etan hasiko da kontzertua, eta orain arte ikasitako obrak eskaniko ditu, gerturatzen direnentzat, harpa klasikoarekin.
Oiartzuarra, zazpi urte zituela hasi zen harpa jotzen, Oiartzungo Ibargain Musika Eskolan, Iñaki Gurruchaga irakaslearekin, eta ordutik ibilbide profesional oparoa izan du. Oiartzunen izan ondoren, Bilboko Juan Crisostomo de Arriaga kontserbatorioan jarraitu zuen formakuntza, Cristina Sanchezekin. Gaur egun Madrilen bizi da, eta bertan musikako goi mailako ikasketak burutzen ditu, Real Conservatorio Superior de Músican.
Kolaborazioak, beste taldeekin
Euskal Herrian eskainitako kontzertuez gain, zenbait kolaborazio ere egin ditu Belaunzaranek, euskal talde eta orkestrekin, eta hainbat musika emanalditan parte hartu du. Besteak beste, Oiartzungo Beira musika taldearekin, Margotu berria diskan kolaboratu zuen, 2016 urtean.
Espainia mailan ere aritu da lanean harpa-jolea, Gaztela Mantxako Santa Zezilia Gazte Orkestrarekin.