Bat egin du Astigarragako Udalak Adecco Fundazioa eta Cidetec-ekin, I. Familia Plana laguntza programa martxan jartzeko. Honen helburua izango da desgaitasunen bat daukatenei laguntzea, autonomia maila haunditu, integrazioa bultzatu eta lan mundura sartzea ahalbidetuz.
Eskaerak, uztailaren 10era arte
Laguntza hau lortu ahal izango dute Astigarragan erroldatuta dauden langabetuek, %33ko desgaitasuna edo haundiagoa dutela onartzen duen ziurtagiria badute. Eskaerak egin ditzakete 16 eta 64 urte bitartean dituztenek.
Programaren helburua izango da eskaera egiten dutenen artean hiru laguni laguntzea. Horretarako, 4.500 euroko aurrekontua jaso da planerako, baina diru hau ez da onuradunei zuzenean emateko izango; «erabiliko da onuradun bakoitzari egokitutako terapiak emango dituzten profesionalei ordaintzeko».
Planean parte hartzeko eskaerak uztailaren 10era arte egin daitezke www.fundacionadecco.org/astigarraga webgunean edo posta arrunt bidez, helbide honetan: Fundación Adecco - Convocatoria Plan Familia Astigarraga 2019; Berastegi kalea 5-2 ezkerra; 48 001 Bilbo.
Eskaerarekin batera aurkeztu behar dira NANaren kopia, eskaera orria, desgaitasunaren inguruko ziurtagiria, 2018ko errentari dagokion ziurtagiria, eta adin txikikoen kasuan, tutorearen baimena eta Familia Liburua.
Emaitzaren berri, uztailaren 17an
Ebaluazio Batzordeak uztailaren 17an emango du laguntza jasotzeko aukeratutako hiru lagunen berri. Alegazioak aurkezteko epea izango da uztailaren 24ra arte: planfamilia@fundacionadecco.org.