Atzo eguerdira arte jaso zituen Kronikak, San Joanetako XII. Argazki Lehiaketan parte hartu nahi zutenen argazkiak. Aurreneko aukeraketa eginda, herritarrek online ikusi ditzakete finalera pasa direnen argazkiak, eta botoa bertan eman, saridunak aukeratzeko.
Bi kategoria daude, eta hiru sari. Bi emango dira helduenen mailan, eta bat, haurrenean.
Inkesta betetzeko aukera, interneten
Argazkiak internet bidez ikusi daitezke, eta botoa ere bertan eman behar da, inkesta online beteta, ondorengo helbide honetan: https://labur.eus/H70Ok.
Erantzuteko epea uztailaren 5ean bukatuko da, eguerdiko 12:00etan. Bi boto eman behar dira; helduen mailan bat, eta haurren mailan bestea. Helduen kategorian bi sari izango dira: aurrenekoarentzat, sei botila ardo, Viña Ardanza Reserva; eta bigarrenarentzat, beste sei botila ardo, Finca San Martin, denak Irizar Ardoakek jarriak.
Haurren mailan, berriz, sari bakarra izango da: Latxe aldizkariko urtebeteko harpidetza, Kronikaren eskutik.
Kronikaren argazkiak, webgunean
Bestalde, Kronikak ere argazki eta bideotan jaso ditu San Joanak. www.kronika.eus webgunean ikusi daitezke guztiak, menuko 'Iruditan' atalean, eta erosteko aukera ere badago.