Maiatza bukaeratik ekaina aldera luzatzen den epean, lau literatura sari jaso ditu Iñigo Legorburuk. Haietako bietan, bera izan da irabazle eta beste bietan berriz, finalista izatearekin konformatu behar izan du. Asteburu bakarrean, Iurretan eta Miranda de Argan gailendu zen, hasteko. 16garren Iurretako bertso-paper lehiaketan, Kristalezko zorua izeneko lanarekin, irabazle izan zen, eta liburuetan gastatzeko 200 euroko bonoa eta bere lanaren argitalpena irabazi ditu. Bertan, ikastetxeko patio edo jolas-garaiak ditu hizpide, eta bertako mikromatxismoa aletzen du zortzi bertsoko bertso-sortan. Andres Calamaroren Paloma abestiaren doinuan eginak daude.
Miranda de Argan berriz, Euskararen Lagunakek antolatutako narrazio laburren lehiaketan, Lagun izeneko kontakizunarekin irabazi du. Bertan, «txakurra da gizonaren lagunik onena» esaldiari buelta eman, eta azaltzen du jazarpena eta bortizkeria matxista jasaten duen emakume batek Lagun txakurraren babesa nola jasotzen duen. Sariagatik, 200 euro, Euskaltzaindiaren liburu-sorta eta Bodegas Inurrietaren ardo botila parea eskuratu zituen.
Finalista, Barakaldon eta Lekeition
Amaitzeko, Barakaldoko XV. Jose Maria Portell literatura lehiaketan finalista izan da, diploma eta oroigarria lortuz Gure itsasoa, denon itsasoa? lanarekin, Pasai Donibaneko batelerak hizpide hartuta.
Plentziako Lanbro beltza lehiaketan ere, finalista izan da Kartzelak lanarekin; hau genero beltzekoa da. Hau horrela, genero beltza bereziki lantzen duen Calibre 38 webgunean argitaratuko du Legorburuk bere lana, hori izango baitu saria.