Balentria borobildu zuten astigartarrek, eta Ataunen beste bi partidu irabazita, Herriarteko Txapelketaren finalean dira!
Abantailarekin joan ziren bertara, bueltakoa jokatzera; eta hori defendatu bakarrik ez, berriro izan ziren nagusi. Beste erakustaldi bat eskainita hasi ziren finalerako bidea errazten, Ekain eta Eñaut Lizeaga anaiak, eta 22-7 irabazi zuten kadete mailakoa. Gero, askorik ezin izan zuten egin, jubenil ataundarren mailaren aurrean, Aimar Mujikak eta Ganix Urdangarinek, eta 4-22 galdu zuten.
Baina hala ere, abantailarekin iritsi zen Astigarraga, nagusien partidu erabakigarrira: 15 tanto behar zituzten, Hodei Expositok eta Jokin Santxezek. Eta ez ziren tanto horiekin konformatu; 22-13 irabazi zuten, txapelketa zoragarria borobildu eta final haundirako pasea ziurtatzeko. Ederki ospatu zuten, bertaratutako herrikideekin.
Finalean, Azpeitia izango dute kontrario, azkeneko lau urteetako txapelduna. Datorren larunbatean bertan izango da, Donostiako Atano III frontoian, arratsaldeko 16:30etan. Aurretik, 15:30etan, aukeratuko dituzte finalerako pelotak.
Eta egun batzuk lehenago, asteazkenean, entrenamendu saio berezi bat egingo dute astigartarrek, frontoia probatzeko; Atano IIIn, arratsaldeko 18:00etatik 20:30etara.
Ekain Lizeagak txapela lau t?erdikoan, festa borobiltzeko
Herriartekoaren finalera sailkatzeaz gain, ospatzeko motibo gehiago ere izan dituzte esku pelotari astigartarrek, asteburu honetan. Izan ere, txapela lortu du Ekain Lizeagak, Gipuzkoako Lau t?erdiko Txapelketan, kadeteen lehenengo mailan. Ostiralean izan zen finala, eta 22-19 nagusitu zitzaion astigartarra, Tolosan, Unai Amiano tolosarrari. Kadeteen bigarren mailan, berriz, Ekialdeko finala galdu zuen Axier Saralegik, Intxurreko Lizarribarren kontra, Oiartzunen (15-22).