Berezia izan zen ekainaren 15a, Xalaparta elkartearentzat. Berezia, ez bakarrik 38garren urteurrena ospatu zutelako, bazkari baten bueltan; baizik eta bazkideetako bat omendu zutelako: Aitor Gorrotxategi esku pelotaria, joan den urtean munduko txapeldun izan zena, Bartzelonan.
Bazkariaren ondoren, omenaldi beroa eskaini zioten elkartekideek. Aurrena, berarentzako propio prestatutako bertsoak kantatu zizkioten, guztien artean. Eta ondoren, txapela, plaka eta lore sorta jaso zituen Gorrotxategik, familian. Mikel Ruizek jantzi zion txapela, eta esan: «dauzkazun txapela guztien artean, maitasun gehiena duena da, bazkide guztien maitasuna baitarama».
Baina txapela bat ez, bi jaso zituen Gorrotxategik; bigarrena, lagunek eskaini ziotena, «beti hor egoteagatik, behar denean laguntzen». Omenaldia eskertu zuen Gorrotxategik: «zorionez, txapela asko irabazteko aukera izan dut, lanarekin. Baina bereziki geratzen direnak, oroitzapenak dira; eta zalantzarik ez izan, gaurko eguna horien artean egongo dela».
Mus Txapelketako lau bikote onenei ere, bazkalondoren eman zizkieten sariak: Ramon Apaolaza eta Peli Goya txapeldun; Txema eta Goyo Mitxelena bigarren; Jacinto Morato eta Julio Cano hirugarren; eta Juan Otegi eta Bixente laugarren.
?Txatxon? omenduko du gaur, Xalaparta txarangak
Gaur ere izango da, omenaldi berezirik. 23:15etan aterako da Xalaparta txaranga, eta bere zuzendari izan zen Iñaki Apezetxea Txatxon omenduko du 00:00etan, Oindi tabernaren aurrean, Gu gera Euskadiko abestuz. Gonbitea luzatu dute.