Asteburu honetan ere galtzak bete lan ibiliko dira txirrindulari gazteak. Bereziki, XXX. Gipuzkoako Itzulian. Atzo hasi zen, erlojupeko prologoarekin. Aurreneko etapa izango dute gaur.
Prologoa eta hiru etapa
Atzo prologoaren ondoren, gaurtik astelehenera hiru etapa egingo dituzte.
Gaur, 10:30etan hasita, 78,3 kilometroko ibilbidea egin beharko dute, Olaberrian hasi eta bukatuta. Bihar, berriz, 16:00etan egingo da bigarren etapa; kasu honetan, 89,4 kilometroko ibilbidea egin beharko dute, Andoainen. Azken etapa astelehenekoa izango da: Lazkaon izango da, 95,3 kilometrotakoa, 16:00etan.
Azparren, indarrean
Bestalde, pasa den asteburuan berriro ere erakustaldi bikaina egin zuen Laboral Kutxarekin aritzen den Xabier Mikel Azparren astigartar gazteak, XXXVII. Volta a Castelló proban.
Irabazlea Lizarteko Eugenio Sánchez izan zen, baina azken etapa astigartarrak irabazi zuen, 50 kilometrotako bakarkako ihesaldian erakustaldi zoragarria eginda.