Azken txanpan sartuta dago Astigarraga, Herriarteko Esku Pelota Txapelketan. Finalerdietako bueltako partiduak jokatuko ditu gaur, Ataunen kontra. Han izango dira hiru partiduak, 19:00etan hasita, eta autobusa aterako da Astigarragatik, herritarrak animatzera joateko.
Abantaila, aldeko
Lehengo astean, ostiralarekin, joaneko partiduak jokatu zituzten etxean bertan, eta Astigarragak finalera sartzeko pauso haundia eman zuen. Izan ere, 2 eta 1 nagusitu zen.
Kadete mailan, Eñaut eta Ekain Lizeaga anaiek erraz menderatu zituzten Zubizarreta eta Goikoetxea; 22-7. Jubeniletan, ordea, berdindu egin zen kanporaketa: 9-22 galdu zuten Aimar Mujikak eta Ganix Urdangarinek, Senar eta Etxeberriaren kontra. Partidu erabakigarria izan zen, beraz, seniorrena, eta aldeko abantaila lortu zuen Astigarragak; 22 eta 13 irabazi zieten Hodei Exposito eta Jokin Santxezek, Zubizarreta eta Baztarrikari.
Aldeko 2 eta 1eko abantaila horri etekina ateratzea izango da giltza, hortaz, gaurkoan, finalerako sailkatzea. Beste finalerdiko bueltako partidua Azkoitia eta Azpeitiaren artekoa da, eta azken honen alde dago balantza oraingoz, 1 eta 2.
Autobusean, Ataunera
Herritarrak animatzera joateko autobusa aterako da gaur Astigarragatik, 17:45etan Ekaitz paretik. Izena emateko zerrenda Ikatza eta Zipotza tabernetan dago, 5 eurotan.