Ohiko irudia izaten da edozein ekintzatan, eta beharbada gehiago San Joan jaietan: herritarrak, argazki kamara edo telefono mugikorra hartuta, batari eta besteari argazkiak ateratzen. Eta badira dozena bat urte, San Joan jaien xarma eta giroa argazkitara eramateak, saria daukala. Aurten ez da salbuespena izango: 12garrenez antolatu du Kronikak, San Joanetako Argazki Lehiaketa.
Hiru sari, argazki onenentzat
Aurtengo lehiaketako partehartzaileen artean, hiru sari banatuko dira: helduen kategorian bi, eta haurren artean beste bat. Zehazki, helduen lehiaketa irabazten duenak, jasoko ditu: sei botila ardo, Viña Ardanza Reserva; eta bigarrenak, beste sei botila ardo, Finca San Martin. Bi sariak, Irizar Ardoakek jarriko ditu.
Eta haurren artean irabazten duenak, berriz, Latxe aldizkariko urtebeteko harpidetza jasoko du, Kronikaren eskutik.
Lehiaketan edozeinek hartu dezake parte, eta gaurtik hasita, ekainaren 28ra arte entregatu daitezke argazkiak; eguerdiko 12:00etan bukatuko da epea.
Formatu digitalean entregatu behar dira, eta horretarako, bi aukera daude: emailez bidali, kronika@kronika.eus helbidera; edo Kronikaren bulegora ekarri (Larramendi kalea, 11). Jakinarazi beharko dira, egilearen izen-abizenak eta telefonoa; haurren kasuan, adina ere bai.
Astebeteko bozketa irekia, irabazleak aukeratzeko
Argazki guztiak jaso ondoren, argazki onenen aukeraketa bat egingo du Kronikak; eta horiek, ikusgai jarriko ditu www.kronika.eus web orrian, 28an bertan. Hortik aurrera, herritarrek aukeratuko dituzte irabazleak.
Uztailaren 5eko eguerdira arte bozkatu ahal izango da, eta bakoitzak, bi argazki aukeratu beharko ditu: bat helduen kategorian, eta beste bat haurren kategorian.