Pasa den asteburuan San Antonio festetan, Ereñotzuko Txirrita eskolako patioan hainbat txikizio egin zituzten: egurrezko etxea, mahaia eta bankuak txikitu, hormetako ikasleek eginiko lanak kendu, erre? gertaturikoa salatu nahi dute Txirrita Eskolako Ikas Komunitatea eta Ereñotzuko Olak Auzo Elkarteak eta idatzi bat argitaratu dute gertaturikoa ezagutarazi eta salatzeko. «Ekintza hau ez dugu bihurrikeriatzat hartzen, bandalismotzat; auzo eta auzotarrei errespetua galduz, kaltetu nagusiak auzoko haurrak izanik».
Patioaren eraldaketa izan zen eginiko proiektua eta honek etsipena sortu du
Joan den ikasturtean urte osoan zehar ikas komunitatean eginiko proiektua izan zen patioaren eraldaketa. «Gure eskola txikiarentzat gastu ekonomiko haundia izan zen. Komunitateak lan, denbora, esfortzu, ilusio eta maitasun haundia jarri zuen hau gauzatzeko. Orain, denak haserre eta minduta egoteaz gain, ikasleen aurpegietan etsipena, dezepzioa eta desengainua ikusten dugu, gertuko pertsona batzuk ilusioz sortutako patioa suntsitu dietelako».
Gertaera hauek ekiditea denon esku dagoela diote oharrean: «norberak egiten duenaren ardura hartzeaz gain, inguruan egokitu direnek, lagunek? jarrera desegokiak direla adierazi beharko lukete eta modu horretan jarrerak aldatzea ahalbidetu».
Horregatik, egin edo ikusi dutenei, baina ezer esatera ausartu ez direnei, eskatzen diete eskolara edo gurasoengana jotzeko «auzolanean konpontzen dugunean zuen parte hartzea izan dezagun. Denon artean denon gauzak zaindu ditzagun».