Kirol Eguna antolatu du kiroldegiak bi egunez, ikasturtean zehar emandako ikastaroak agurtzeko. Hainbat saio libretan parte hartzeko aukera izan zen atzo, eta gaurkoan borobilduko da festa, azken saio ireki batekin eta bazkariarekin.
HIIT saioa, bazkalaurretik
Goiza HIIT saio ireki batekin hasiko da, 11:30etan. Kirol honen oinarria da bizitasun edo intentsitate desberdinetako ariketak tartekatzea. Horrela, batetik erresistentzia maila hobetzen da, eta, bestetik, gantza erretzen da.
Erretakotik zerbait berreskuratzeak ere ez du kalterik egiten, ordea, eta eguna festa giroan bukatzeko, ikasturte amaierako bazkaria egingo da eguerdiko 14:00etan.
Hortik aurrera, norberaren esku izango da, festa noraino luzatu!
Datorren ikasturtean, gehiago
Atzo eta gaurko Kirol Egunekin ikasturtea agurtuko dute kiroldegian, baina datorren ikasturterako eskaintzaren berri eman dute, dagoeneko; baita izenemate epea itxi ere.
Dena den, irailean berriro irekitzen da izena emateko epea, eta lekua geratzen den ikastaroetan aukera izaten da tokia eskatzeko.
Beraz, izena non eman daitekeen jakiteko, kiroldegitik pasa edo bertara idatzi daiteke: kiroldegia@astigarraga.eus.