Ikasturteari bukaera emateko, kirol diziplina ezberdinen maratoi moduko bat prestatu dute Astigarragan, beste behin. Kirol Eguna ospatuko dute, gaur eta bihar, kiroldegian; eta hainbat kiroletako saio irekiak eta erakustaldiak egingo dituzte, bi egunetan.
Arratsaldeko 17:00etan hasiko dira saioak, gaur. Aurrena, erakustaldi bana eskainiko dute, zumba eta jump fit diziplinetako haur taldeek.
Eta hortik aurrera, saio irekiak izango dira, kiroldegiko monitoreen eskutik. Aireko pilates saioarekin ekingo diote, 17:00etatik 18:00etara, Joserekin, gaztelaniaz. Helduentzako saioa izango da.
Ondoren, beste bi saio ireki hasiko dira, biak ere euskeraz: jump fit saioa eskainiko du Maiderrek, pistan, 18:00etatik 18:45etara; eta strong by zumba saioa Eiderrek, 18:00etatik 19:00etara.
18:15etan hasiko da TRX saioa, gaztelaniaz, Joseren eskutik hori ere, hiru ordu laurdenekoa. Gero, 19:00etatik aurrera, kardiobox saioa eskainiko du Leirek, 20:00ak arte.
Eta bukatzeko, 19:15etan hasiko dute, arratsaldeko saiorik luzeena: ziklo indoor saioa egingo dute, Aitziberrek eta Josek gidatuta, 20:45ak arte.
HIIT saioa eta bazkaria, biharko plana
Bihar segiko du Kirol Egunak, baina bakarra izango da kirol saioa: HIIT egingo dute, Jose eta Leirerekin, 11:30etan hasi eta 12:30ak arte.
Eta hortik, elkarrekin joango dira bazkaltzera, 14:00etan egingo baitute ikasturte bukaerako bazkaria.
Saio irekietarako zein bazkarirako, dena den, aldez aurretik eman behar zen izena.