Astigarragako Gazteek bi zita izango dituzte gaur eta bihar. Aurrenekoa, Udalak deituta, Gazte Plana osatzeko bilera izango da. Eta bigarrena, aldiz, Gaztelekuak antolatuta, logo berriaren jaia egingo dute bihar.
Herri Eskolan, gaur
Gazte Plana egiten ari da Udala, eta hori ahalik eta osatuena izan dadin, bilerara deitu ditu herriko gazteak. Arratsaldeko 18:00etan, Herri Eskolan.
Hain zuzen, 12 eta 35 urte bitarteko gazteak hartuko ditu kontuan Gazte Planak, eta haien ekarpenak egitera gonbidatu ditu. Besteak beste, etxebizitza, kultura, garraio publikoa, hezkuntza, herri izaera... gaiak jorratuko dituzte.
Etxebizitza, kultura, garraio publikoa, hezkuntza, herri izaera... jorratuko dituzte gaur.
Logo berriaren jaia, bihar
Jaia izango dute bihar, Gaztelekuan. Prozesu parte-hartzailearen ondoren, logo berria dauka Gaztelekuak, eta hori ospatuko dute festa-giroan. Arratsaldeko 17:00etatik 20:00etara izango da, Gaztelekuan.
Logoa aurkeztu ondoren, hiru tailer egingo dituzte: serigrafia tailerra, alkoholik gabeko koktail tailerra eta txapa tailerra.