San Joanetarako entrenatzen hasteko, korrika pasako du larunbat arratsaldea Azeriak. 21garren Azeri Bilan izango da hori, 17:30etatik aurrera, Urbieta kaletik abiatuta.
Gaztetxoenek emango diote hasiera lasterketari; 18:30ak arte, sei lasterketa egingo dituzte Haur Hezkuntza eta DBH 3 eta 4 mailakoen artean.
Horiek bukatuta, 18:30etan hasiko da lasterketa nagusia, helduena. Aurten ere, Hernaniko taldeek aukera izango dute taldeka lehiatzeko; lau kideko taldeak onartuko dira.
Internet bidez eman ahal izango dute izena helduek, bihar arte, 10 euroren truke.
Izenematea, egunean bertan ere bai
Aurretiko izenematea bihar arte egin ahal izango dute bai gaztetxoek, baita helduek ere.
www.rockthesport.com webgunean egin ahal izango dute helduek, 10 euroan. Ondoren, egunean bertan jaso beharko dute dortsala, 16:00etatik aurrera; bertan txertatuta joango da txipa. Egunean bertan ere, eman ahal izango da izena, 16 euroan.
Gaztetxoen kasuan, haiek ere bihar arte izango dute aukera apuntatzeko. Horretarako, CD Hernaniren atletismoko pistaren bulegoan apuntatu ahal izango dute gaur eta bihar, arratsaldeko 18:30etatik 20:00etara bitarte.
Gaztetxoenek ere, egunean bertan eman ahal izango dute izena, 16:00etan hasita.