ARGAZKIAK - San Joan jaien Preludioa
Giro ederra izan zen larunbat gauean, Atsegindegiko iluntasun koloretsuan. Nabari zen, San Joan jaiak iragartzeko kontzertua zela, eta nabari, era berean, festarako gogoz daudela hernaniarrak. Preludioak egin zien ongietorria, igande eguerdian hasiko diren jaiei, Ozenki abesbatzak txupinazoa botatzearekin batera.
Dena den, aurretik ere izango dira ekintzak, larunbatean. Goizean izango dira aurorak, San Joan Saria tiro txapelketa Hondarribian, emakumezkoen zazpiko errugbi torneoa Landaren, kirol ludoteka kiroldegian, Hernanin Ikusiyak erakusketaren inaugurazioa Biterin, eta San Joan waterpolo txapelketa kiroldegian. Arratsaldean, berriz, esku pelotako Berria Txapelketaren finalak kiroldegian, Miguel Olloren Oroimenezko tiro txapelketa Txantxangorrin, eta Azeri Bila lasterketa Urbieta kalean.
Gainera, Elkartasun Eguna ere ospatuko da: mus txapelketa azkarra (izenematea Garinen), brindisa, herri bazkaria (txartelak Garinen), bingo herrikoia, poteo musikatua eta kale animazioa, afaria, eta herri mugimenduaren txupinazoa.
Preludio elektronikoa, Santa Barbaran
Beste ekintza berezi bat ere izango da, larunbatean bertan: Preludio elektronikoa eskainiko du Mister Zeus disko jartzaile hernaniarrak, 20:00etan hasita bi orduz, Santa Barbarako tiro gune zaharrean: «momentu ahaztezin bat bizi nahi baduzu, animatu eta gozatu lagunekin», luzatu dute deia.