Bisitan izango da Hernanin, beste behin, liburu eta disko azoka, Kaleko Elkartasun eta Kultur Elkartearen eskutik. Gaur jarriko dute postua, goizeko 10:30etatik 14:00etara. Tokia aldatu dute, eta Plaza Berrin beharrean, Nafar Kalean jarriko dute, Kixkal tabernaren parean.
Bertan, eskuragarri izango dira 1.000 liburu, disko eta CD baino gehiago, guztiak «egoera onean», nabarmendu dutenez.
Baina erosteko bakarrik ez, emateko ere izango da aukera, azokan. Izan ere, material bilketa ere egingo dute bertan, eta nahi duenak, eman ditzake erabiltzen ez dituen liburu, musika CD eta binilozko diskoak. Entziklopediarik edota aldizkaririk ez dute jasoko.
Edozein kasutan, norbaitek materiala eman nahi baina gaur bertaratzerik ez badauka, harremanetan jarri daiteke, azokasolidario@gmail.com helbide elektronikora idatzita.