MUTTUAI Fest ostegunean hasi zen eta erdia baino gehiago pasa da. Bi egun geratzen dira kultur ekitaldiak amaitzeko eta badago oraindik denbora musikaz blai egoteko eta gozatzeko.
Gaur 18:00etan hasiko dira musika emanaldiak. DJ Aleman kultur etxean ariko da bi saiotan; 18:00etan eta 20:00etan. 19:30etan Black Gamba Donostiako taldeak eskainiko du kontzertua Apeztegi plazan, Ikatza tabernaren ondoan. Black Gambak hiriko soinu modernoa eskaintzen du, reggae, funk, hip hop, soul eta rock estiloen eragin nabarmenarekin. 30 kanta baino gehiago dituzte errepertorioan eta hiru hizkuntzatan aritzen dira. Musika dantzagarria da, baina erritmo beltz gogorreko melodiak ditu eta harmonikoki aberatsa da. Bandaren zuzenekoa indartsua eta ikusgarria da, bi abeslari/dantzari ditu eta haien atzean energiaz betetako talde bizia.
Eszenatoki berdinean 22:00etan, Suakai taldearen ikuskizuna egongo da. Musika edo ikuskizun eszenikoen ekoizpen zein musika-estilo desberdinetako kontzertuetan espezializatuta dago. Ikuspegi nazionaleko instrumentista onenekin sortutako musikari taldea du.
Aiztondo abesbatza eta La Joderera elkarlanean festari amaiera emateko
Bihar goizetik hasiko dira musika doinuak kaleak girotzen. Eguerdiko 12:00etan Mac Jeara`s Band herriko kaleetan barena ibiliko da eta arratsaldeko 19:00etan Petti nafar abeslari eta gitarrajole euskaldunak kontzertua eskainiko du kultur etxean.
Ondoren amaituko da Muttuai Fest 20:00etan, Murgia eszenatokian. Herriko abesbatzak eta La Jodedera kubatar taldeak osatutako ikuskizuna burutuko da, amaiera berezi bat egiteko asmoz. Bi kulturen nahasketa bat egin nahi izan da euskal musika kubatar erara jota.
Lehendabiziko egunean hasiera atzeratu zen euri zaparradarengatik
Muttuai Fest ostegunean hasi zen Kazkarabarra taldearen saioarekin eta hitz jokoa eginda esan liteke Kazkarabarrak kazkabarra ekarri zuela. Euria erruz egin zuen lehendabiziko kontzertuetan eta horrek suposatu zuen ordutegia atzeratzea. Seitan hastekoak ziren, baina zazpiak pasata eman zitzaion hasiera Muttuai Festi. Dama Beltza kontzertua ordubete atzeratu zen. Atzo ere lainoak agertu ziren kontzertuak hasi ziren garaian, baina ez zen ostegunekora hurbildu ere egin.
DJ Aleman, Black Gamba, Suakai, Mac Jeara´s Band, Petti, Aiztondo eta La Joderera taldeak ariko dira gaur eta bihar musika eskaintzen hiru guneetan.
Horrek jendea animatu zuen eta lehenengo egunean baino jende gehiago mugitu zen prestaturiko hiru guneetan. Hala ere, jende gehiena astebururako, gaur eta bihar, espero da antolatu diren kontzertuetarako. Zazpi talde ariko dira guztira prestaturiko hiru guneetan.