San Joan jaiak gerturatzen ari direla eta, larunbat honetarako jarri du hitzordua, Hernaniko Bilgune Feministak: autodefentsa feministaren inguruko tailer bat antolatu nahi izan du, «San Joan jaien aurretik».
Izan ere, nabarmendu du: «eraso sexista eta matxistak etengabe eta gure egunerokoan jasaten ditugu, eta jaiak ez dira horren salbuespen». Eta adierazi du, jaiek «gizarte baten antolaketa eta balioak» islatzen dituztela, hain justu.
Hori horrela, larunbat goizerako antolatu du autodefentsa feminista tailerra, hiru ordu eta erdikoa; 09:30etan hasi, eta 13:00ak arte.
Izenematea, aldez aurretik
Tailerrean parte hartzeko, hori bai, aldez aurretik eman beharko da izena. Horretarako, mezua idatzi behar da, helbide elektroniko honetara: hernanikotxokofeminista@gmail.com.
Edozein kasutan, irekia eta doakoa da saioa.