Erabaki Hernani aurrekontu parte-hartzaileen prozesuaren aurreneko fasea bukatzear da. Maiatzaren 30ean martxan jarri zenetik, 6 bilera egin ditu Udalak auzoka, Karabel, Lizeaga, Zikuñaga, Portu, Antziola eta Latsunbe Berrin, eta azken hirurak egingo ditu orain.
Gaur, 19:00etan udaletxean bilduko da Kaxkoko bizilagunekin, baina «herriko talde eta eragileei deia luzatu» zaie bertara azaltzeko, «euren eskaerak egin ditzaten. Eurak dira, besteak beste, herriari bizitza ematen laguntzen dutenak».
Hurrengo bilera asteazkenean izango da, 19:00etan Etxeberri-Floridako auzo elkartean, eta azkena, ostiralean, 19:30etan Sorgintxulon.
Dena den, herritarrek proposamenak egin ditzakete hilaren 17ra arte, herrian jarri diren postontzietan edo interneten: erabaki.hernani.eus.