ETXEBERRI auzoaren urbanizazioa ixteko lanak hasiko dituzte datorren astean. Irisgarritasuna hobetzeko asmoz, udal zerbitzuen sarea (ur eta saneamendu hornidura, argiteria eta espaloiak) berritzea da urbanizazio proiektuaren helburua. Hastekoa den urbanizazioaren 2.2 fase honek 1-3 blokeen beheko eremua eta 7. blokearen arrapala, espaloia eta eskailerak hartuko ditu. Lanek bost hilabete irautea aurreikusten dute.
Etxeberri auzoaren urbanizazio proiektuaren bigarren faseak auzoaren eskubiko aldea hartzen du. Proiektuaren garrantzia ikusita, bi ataletan banatu zen. Lehen atala -2.1.- iazko irailean bukatu zen. Obra horrek 5-7 bitarteko blokeen eremua, auzoaren goiko eremua (1-3 bitarteko blokeak) eta auzoko errepidearen ezkerreko espaloia eta hegoaldeko oinezkoen eremua hartu zituen. Orain, bigarren atal honetan, 1-3 blokeen beheko eremua eta 7. blokearen arrapala, espaloia eta eskailerak berrituko dituzte. Bost hilabeteko iraupena izango dute lanek.
Ur horniduran hobekuntzak
Ur horniduran egingo diren berrikuntzen artean aipagarria da ur presioaren egokitzea; izan ere, egun, 6-10 blokeetan uraren presioarekin arazoak dituzte. 6, 7, 8 blokeetan, ur presio gutxiegi daukatelako gainpresio balbulak erabili behar izaten dituzte. 9 eta 10. blokeetan, aitzitik, gehiegizko presioa murrizteko erreduktorea dute. Arazo horiek konpontzeko Oriabentatik datorren sarean erreduktore bat jarriko du Udalak eta bloke guztiei ura presio egokian iristeko. Horrela, bizilagunek ez dute bestelako aparailuren beharrik izango eta, hortaz, egun ordaintzen ari diren aparailu horien kostua desagertuko da.
Horrekin batera, Udalak uda amaieran ekingo dio asfalto kanpainari eta horren barruan dago Etxeberri. Auzoko bide nagusia eta etxebizitzen ondoko aparkalekuen zorua berrituko dituzte.