Auzotarrak omentzeko momentua izaten da txupinazoa, eta atzokoan, auzoko merkatariak izan zituzten gogoan. Auzoari bizitza ematen dio merkataritzak eta merezitako omenaldia jaso zuten.
Ondoren umeek gozatu zuten buruhaundien irteerarekin eta puzgarriak ere izan zituzten. Festetako ekitaldi estimatua izaten da danborrada, eta nagusiena atzo gauean izan zen. Gaur jarraituko du festak.
Gaur da festen egun haundia, ekitaldiz josia goizean hasi eta gauera arte, geldiunerik gabe.
Sagardo Bowlekin hasiko da eguna eta ondoren haurrentzako tailerrak egongo dira, baita apar festa ere. Jubilatuentzako jolas ezagunak eta luntxa antolatu dituzte eta nahi duenarentzako patata tortilla txapelketa. Hori dena goizean zehar izango da paella-jate herrikoirako paella prestatzen duten bitartean. Behin bazkaldu eta gero, arratsaldeko ekitaldiek hartuko dute erreleboa.
Aurrena, Mus Txapelketa azkarra egingo da, eta ondoren, 4-15 urte bitartekoentzat kirol jolasak auzoko Denontzat Gimnasioak antolatuta. Marsel Magoaren ekitaldia hasi aurretik, haurrentzako txokolate-janak barruak berotuko dizkie gazteei.
Festan parte hartzen duen edozeinek bingo herrikoian ongi pasatzeko aukera ere izango du. Disko festak eta zezen suzkoak emango diote amaiera, gaurko egitarauari.
Bihar amaituko dira festak. Meza, haurren danborrada, sagardo dastaketa, errifaren zozketa eta jaien amaiera etorriko da azken trakarekin.
Gaur, larunbata
10:00, Sagardo-Bowl txapelketaren hasiera.
11:00, Haurrentzako tailerrak.
11:30, Jubilatuentzako jolas ezagunak eta luntxa.
12:00, Aparraren festa.
12:30, Patata-tortilla txapelketa.
14:30, Paella-jate herrikoia Etxeberriko pelotalekuan.
15:30, Mus Txapelketa, Etxeberri Elkarteak antolatua.
16:30, Kirol jolasak 4-15 urte artekoentzat, Denontzat Gimnasioak antolatuta.
18:00, Haurrentzako txokolate-jana.
19:00, Marsel Magoaren ekitaldia Etxeberriko pelotalekuan.
20:00, Sagardo-Bowl txapelketaren amaiera.
20:00, Bingo herrikoia.
21:00-00:30, Disko festa.
23:00, Zezen suzkoa.
Bihar, igandea
11:00, Meza Nagusia hildakoen omenez.
11:00, Haurren danborrada.
12:30, Sagardo dastaketa, txarangarekin batera.
13:00, Errifaren zozketa.
14:30, Jaien amaiera eta azken traka.