Mendekosteak atzo hasi ziren, txupinazoaren jaurtiketarekin, eta gaur ekitaldi ugari izango dira; eta berrikuntza deigarri bat dago egitarauan. Lehenengo aldiz Sagardo Bowl txapelketa antolatu dute. Baina zer da Sagardo Bowl txapelketa? galdetzen dute askok.
Horren erantzuna Iker Inzak du, txapelketako antolaketaren eta Etxeberrin dagoen Distopia Games dendaren arduradunak. Jokuaren nondik norakoak azaldu dizkio Kronikari.
Erantzuna erraza da. Blood Bowl mahai jokoa da Sagardo Bowl eta Inzak gaineratzen du «oso dibertigarria da. Jendeak oso ongi pasako du jokatzen». Hernanira egokitua dago izena. Bi jokalarik jokatzen dute beti, bata bestearen aurka, amerikar futbolean bezala.
Guztira 26 talde daude eta bakoitzak bere izaera du Inzak argitzen duenez. «Gizakiz osatutako taldea dago, talde estandarra litzakena. Talde hau ez da onena ezaugarri desberdinetan, baina oso konpletoa da eta denetarik egiten du. Etsaiak sahiestu, aurkariak plakatu, jo, estrategiak erabili? eta horren aurrean indar haundiagoko taldeak egon daitezke, baina mantsoagoak direnak, orkoak edo ipotxak bezala esaterako. Honela, guztira 26 daude».
«Jokoan 26 talde desberdin daude; gizakiak, orkoak, ipotxak... eta bakoitzak bere ezaugarriak ditu».
Gustukoen duzun taldearekin jokatzen da
Jokalari bakoitzak, ezaugarriak kontutan hartuta, gustuko duen tadea aukeratzen du eta txandaka jokatzen da. Ikerren esanetan, «jokalari bakoitza bere taldeko jokalariak aktibatzen doa eta hauek mugitzen ditu, baloia alde batera edo bestera mugitu dezakete. Tarteak edo zuloak sortu aurkariaren defentsan touchdownak sartzeko tantoak sortuz».
Partidu hasieran hamaika jokalarik jokatzen dute eta «aulkian jokalari gehiago eduki ditzakezu gero zelaian sartzeko lesioak egoten baitira. Amaieran zortzi bosten aurka bukatu dezakete adibidez» gaineratzen du Inzak.
«Burgosekoak ?Morcilla Bowl? izena duen bezala, Hernanikoari Sagardo Bowl jarri diogu izena».
Jokalari bakoitzak bi partida jokatuko ditu goizean, eta beste bi arratsaldean
Partidaren iraupena zehaztuta dago torneoetan. Neurtuta daude denborarekin, kronometroarekin. Mendekosteetan, Etxeberrin, ordu eta 45 minutuko partidak jokatuko dira.
Gehiegi ez luzatzeko «goizeko hamarretan hasiko ditugu partidak, eta arratsaldean amaituko da txapelketa. Goizean talde bakoitzak bi partida jokatuko ditu eta arratsalden beste bi» dio Ikerrek.
Tartean bazkaltzeko geratuko dira. «Murriztu egin behar izan da denbora bestela ez du denborarik emango. Torneoetatik kanpora partidu batek orduak eta orduak iraun ditzake. Azkeneko Ligan jokatu zen finalean lasai hartu zuten jokalariek, eta zazpi ordutara joan ziren».
27 talde ziurtatuta daude, eta Bruselako jokalari bat ere etorriko da
Guztira Etxeberriko Sagardo Bowlen 27 taldek eman dute izena. Nahiz eta gaur Etxeberrin gehiago egon daitezkeen izenematea luzatu delako azken egunera arte.
Antolakuntzak ez du kanporaketen sistema erabiliko. «Puntuen arabera egingo da sailkapena. Parekatzeak zozketa bidez egiten dira eta suitzar metodoa erabiltzen da. Irabazten dutenak, beraien artean jokatzen joaten dira, eta galtzen dutenak, beraien artean. Honen helburua da galtzen duenarentzat dibertigarria eta atsegina egitea txapelketa».
Etxeberrira inguru desberdinetatik etorritako jendea egongo da. «Donostialdekoak, Gipuzkoarrak, Bartzelonatik, Bilbotik, Iruñeatik eta Bruselako bat ere etorriko da jokatzera».
Jai Batzordetik esan zioten Iker Inzari txapelketa antolatzeko, eta gustura hartu du erronka, Distopia Games dendako arduradun hernaniarrak. «Dendan noiz behinka txapelketak antolatzen ditut, baina leku txikia da eta jai batzordeko lagun baten ideia izan zen festetan antolatzea. Antolaketa lanetan asko lagundu didate Jai Batzordekoek, eta oso gustura nago». Eguraldia da kezka bakarra, baina euria eginez gero, Etxeberriko blokeen azpialdean egingo da.
«Donostialdean 40 pertsonez osatutako Liga dago»
Etxeberriko txapelketaz gain Liga desberdinak jokatzen dira. «Donostialdean 40 pertsonen arteko Liga bat daukagu eta txapelketa desberdinak jokatzen dira. Burgoseko txapelketa Morcilla Bowl den bezala Hernanikoari Sagardo Bowl jarri diogu izena».
«Partaide guztientzat egongo dira sariak, baita figurak margotzen erakusten duen liburua ere».
Mundu mailako liga eta Mundiala jokatzen dira
Blood Bowl jokua arautua dago eta erosten duzunean bertan azaltzen dira arau guztiak. Iker Intzak azpimarratzen du joku honen arauak nahiko errazak direla. «Liga ofizial bat dago, Mundu mailakoa. Austrian jokatuko da Mundiala aste gutxi batzuk barru eta 1.800 taldek parte hartuko dute. Talde eta jende gehien mugitzen duen estatua Espainia da».
Jokuak Erresuma Batuko jatorria du eta sortu zuen enpresak jokuak egiten ditu. «Hasiera batean joku hau ez zen izarra. Erdi aroko beste joku batean zegoen sartuta eta hortik sortu zen Blood Bowl. Segituan lortu zuen izugarrizko arrakasta eta ibilbide luzea egin du, 26 urte» Iker Inzaren hitzetan.
Arrakastaren arrazoi nagusienetakoa denboran eta erraztasunean dago. «Partiduak motzak izan daitezke, garraioa oso erraza da logistika aldetik. Munduko Liga gaur egun komunitatearen esku dago eta ez jokua sortu zuen enpresaren esku, nahiz eta orain elkarlanean dabiltzan. Oso joku interesgarria eta dibertigarria da».
Adin guztietako jendea eta sariak denentzat
Ikerrek ongi ezagutzen ditu jokalari asko eta asko. «13 urtetik gorako jokalariak daude, eta adin guztietako jendea aurkitu daiteke».
Eta Etxeberriko txapelketan denentzako sariak egongo dira. Berdin da irabazi edo galdu, denek edukiko dituzte sariak; figurak margotzen ikasteko liburu horietako bat, tartean. Hori da niri gehien gustatzen zaidana, figuren margoketa eta dendan egiten dugu».