Festa ederra ospatu zuten aurreko larunbatean, Hernanin, Goizuetako Umore Ona abesbatzak, Ereñotzuko Ozenki abesbatzak, eta Hernaniko Kantuz abesbatzak eta Doinu Zale akordeoi orkestrak. Kontzertua eskaini zuten Biteri kultur etxean, Ozenkiren 25garren urteurrena ospatzeko; eta ondoren, afaria egin zuten, giro ederrean, Akarregi sagardotegian.
Eta asteburu honetan ere, festarako prest dira Umore Ona abesbatzako kideak. Izan ere, ikasturteari bukaera emateko, kontzertu ibiltaria eskainiko dute bihar, Goizuetako kaleetan barrena.
Aurrena, elizan abestuko dute, jaunartzeak direla eta, goizeko 11:30etan. Eta ondoren, hasiera emanen diote kontzertu ibiltariari, herriko plazan. Kantuan abiatu aurretik, hala ere, hamaiketakoa eginen dute: salda eta txistorra eskainiko dizkiete, plazara gerturatzen diren guztiei.
Eta kalez kale ibili eta gero, bazkaria eginen dute, arratsaldeko 15:00ak aldera, erreka haundiko arbolapean. Bertan ere, egun osoko osagaiak izanen dira protagonista: kantua eta umorea.